羅啟豪新歌挑戰新唱腔 周吉佩通過自傳述心聲

羅啟豪（Ramon）同周吉佩（吉吉）日前到新城廣播宣傳各自嘅新歌。Ramon首新歌就叫《還未分享的歌單》，Ramon就大讚歌詞好好，合作過程都好開心。吉吉首新歌叫《GUTS》，再次對唱跳歌曲發起挑戰嘅吉吉比以往進步咗唔少。

Ramon新歌《還未分享的歌單》係佢嘅第二首個人單曲，Ramon直言：「喺住外國二十幾年，甚至喺美國好多個州都住過，但係陪伴我最多嘅都係音樂同歌單。」更坦言自己係一個擺好多時間整理歌單嘅人，「遇到好鍾意嘅歌會不停咁loop，會諗呢個世界另一個角落會唔會都有人同我一樣loop緊呢首歌，甚至會唔會同我有一樣嘅歌單。」Ramon同全新班底合作，大讚歌詞真係好好，整個合作過程都非常開心，雖然喺錄音過程嘗試新唱腔遇到challenge，錄咗好多次先過，但對最終效果好滿意。

Ramon分享自己歌單，表示鍾意聽葉倩文《完全因你》、鄭秀文《甜》、同Whitney Houston嘅歌，笑言：「我有好多唔通同種類嘅歌單，好似有一個自己專屬嘅流行榜咁樣。」而且仲會為鍾意嘅歌星單獨整一個歌單，可以揾到嘅歌全部都會聽。

被問到中4開始報名，會唔會介紹朋友參加，Ramon就話：「想參加嘅自己已經會報名，我大家姐細個有歌星夢，幻想參加，但係最後都係因爲冇咁多時間所以放棄咗，都係全家都好唱得，希望遲啲有機會可以同家人一齊上台合唱。」

吉吉首新歌《GUTS》加入好有Guts嘅諗法，就係跳舞，再一次挑戰唱跳歌曲突破自己嘅吉吉有明顯進步，佢想帶出一個諗法：「令大家突破自己，只要諗住自己能夠做到啲你做唔到嘅嘢，只要有決心就一定可以做到。」

吉吉七月書展前就會推出自傳《第三人生》，分享好多内心嘅轉變同人生路上追夢嘅經歷：「可能會喺媒體或新聞睇到我經歷過嘅嘢，但係好多内在心理上嘅諗法、轉變、睇法都想透過呢本書講出嚟。主要係兩個方向好想同大家分享，一個係堅持，一個係重生。」吉吉直言失敗唔係一件醜事，失敗之後放棄好容易，但係失敗之後仲可以繼續堅持先係好珍貴嘅過程，經過堅持最後得到重生係好難得嘅結果，好想通過本書宣揚多啲正面能量。

同樣被問到有關中4會唔會介紹身邊朋友參加，吉吉笑稱：「有心參加嘅已經一早參加。」但吉吉都表示：「好期待會再有啲咩傳奇人物會出現，希望我哋中年好聲音呢個family會愈嚟愈大，同埋大家都會有好嘅發展。」

圖片來源：新城廣播