the SOUNDTRACK of my LIFE 馮允謙演唱會2024

Jay Fung事隔年半再次喺紅館舉辦演唱會，成功帶嚟一場高質素嘅演出，更有滿滿驚喜。（我睇10/10第二場）

「人不可永遠萬年青 憑歌可以遠徵 一粒音 一把聲 一首歌 天都震驚」

今次演唱會Jay可以話誠意十足，先以一系列快歌帶動氣氛，及後再送上甜蜜與傷感之抒情作，唱出豐富一夜。

片一：《尋找隱世巨聲》

JF唱功比上年更進一步，由頭到尾都充滿力量，跳唱已經再難唔到佢。仲唱曬依兩年出嘅新歌，演繹足三十幾首作品，出心出力帶精彩嘅表演比觀眾。再配上一隊專業管弦樂團，編曲比CD版豐富，使作品情緒更入心。

「望著壞人 望著笨蛋 充斥於大地 就算㷫到爆炸 仍然毋須撕開他層皮」

片二：《Me and the Moon》

當中我最喜歡《JAY FUNG 儀態訓練學院》接《約齊靈魂在墳墓開生日派對》，依段以血紅色調配上陰森畫面，彷似帶大家進入一場龐大儀式，氣勢強勁，震撼到我起曬雞皮。另外，終於可以live聽到《生不逢時》，實在太幸福！估唔到相隔短短時間，身處同一個場地，Jay能夠帶出一場截然不同嘅視聽盛宴。

片三：《JAY FUNG儀態訓練學院》

「在六百歲終於一起 現在怎可輕輕放棄」

然而，今場show有唔少地方確實做得麻麻。首先，歌單編排唔夠連貫，high咗幾首突然靜返，深情作情緒啱啱醞釀緊又以快歌緊接，係得最後幾首排得比較好。

片四：《All that I want》feat.雷同二友

再者，歌曲選擇同主題soundtrack of my life唔太符合，睇完都無一種陪Jay重新走過成長路嘅感覺，如果唱多啲舊歌，或者再講多啲一路走嚟嘅感受，相信會更好。而燈光方面睇得出製作團隊想搞搞新意思，可惜個人覺得太多同有點刺眼。

雖然演唱會各方面都有些少瑕疵，不過欣賞到Jay咁犀利嘅演繹真係咩都抵曬，聽佢唱歌簡直係完美享受。

片五：《愛斯基摩人之吻》

「誠實地去做你 是你的專利 只等你飛」

由2021年開始，我每年最少睇一次馮允謙嘅現場演出，可以話見證佢成長同進步。到今日Jay已經成為香港一位舉足輕重嘅唱作歌手，希望未來會作多啲好歌，繼續挑戰自己，期待下年再有live show！

片六：《會再見的》

「如何想貪多一秒 未能為你貪 再傾出 每份血肉 這首歌留不低多半晚」

片七：《Like I’m Gonna Lose You》feat. Janice

片八：《生不逢時》

片九：《一步一悔過》

▼Follow hkpopculturelover
Instagram: https://www.instagram.com/hkpopculturelover/