【爆機熱話】《生化危機8》體驗版有得玩繼續第一身踎低起身見頭暈

發布於 2021年01月22日11:50 • 殺意之波動 / 《報紙佬》

香港今早時間，Capcom喺美國搞左個《生化危機8》(Village)網上發佈會，除左講下新Game同有咩同梱產品、遊戲將於5月7日發售外，最佳消息梗係即時開放體驗版下載啦！
.
文：殺意之波動
.
雖然廠方反口話今次有埋PS4同Xbox One版本，不過暫時只有新世代機有試玩版。小編用PS5下載，起初唔係好搵到，以為歐美或日本PSN先有，後尾發覺試玩版有個名叫《Maiden》，大家唔好眼大睇過龍以為無呀！
.
試玩版體驗到4K+HDR，畫面真心激讚，氣氛營造亦相當唔錯，尤其走到去大屋後，勁有一代嘅經典大屋Feel，讚！
.
試玩版唔算長，背景承襲七代逃出後故事，慢慢玩都係10分鐘度就過關。新作跟番七代都係第一人稱，對3D有頭暈嘅玩家可能會叫苦，加上設有踎低動作，好多道具、文件都要踎低先搵到，真係好易會踎低起身見頭暈，尤其超初嘅牢獄，環境又黑又多監房，好易迷路周圍打困籠，變相更易暈。小編都自問玩兩粒鐘VR都頂得順，反而玩完《Maiden》胸口有啲作悶，建議大家唔好食飽先黎玩。