100毛「叻叻」效力3年離巢　感恩一畢業就遇到東方昇

繼專家Dickson（阮文泰）和盤菜瑩子（柯驛誼）早前告別效力長達10年的「100毛」後，新晉女主持叻叻（Natalie Ho、Nat Nat）昨日（9月24日）亦於社交平台宣布離巢。幾年來曾參與過《國家級任務》、《圍爐取暖》、《叻Let’s Go!!》等節目的叻叻透露，加入100毛3年間，到離開一刻感覺好唔真實，百感交集，「特別感恩，畢業第一份工就遇到一位好似 wkw（王嘉偉、東方昇）咁好嘅上司。」

叻叻在社交平台分享多張在100毛的工作照，寫道：「Ahhh～眨吓眼喺100毛已經3年，到真正要離開嘅一刻，種感覺真係好唔真實，百感交集。多謝公司畀咁大自由度我哋，讓我哋可以放膽試盡各種天馬行空嘅想法，經歷咗無數難忘時刻。呢段瘋狂又熱血嘅時光，絕對係我人生中好寶貴、好閃爍嘅一部分。三年嚟，多謝每一位曾經並肩作戰嘅幕前幕後戰友，多謝你哋每一位嘅照顧同包容。好慶幸可以同你哋一齊笑、一齊癲、一齊捱更抵夜，創造出獨一無二嘅回憶。」

叻叻特別感謝東方昇（王嘉偉）：「特別感恩，畢業第一份工就遇到一位好似 wkw 咁好嘅上司。你唔單止係引導我成長嘅導師，同時亦為我哋遮風擋雨，令大家可以毫無後顧之憂，專注「只管拍好啲片就夠」！多謝你一直以嚟嘅信任，肯放手俾機會我哋嘗試、撞板、同成長。最後，一定要衷心多謝一直以來支持我哋嘅每一位觀眾！你哋每一句留言、每一份鼓勵，都係我哋繼續創作最大嘅動力！」。

叻叻直言對將來有少少恐懼：「講到將來……坦白講，有啲未知，亦有少少恐懼，但更多嘅係對新挑戰嘅期待！無論開心的傷心的，都是一種經歷與成長，衷心多謝每一位曾經同行過嘅你哋。念念不忘，必有迴響 @100mosthk 我哋，下一站見！」。