Zelos 黃凱逸 一段由心出發的旅程

讀書時期，身邊總有些同學零舍突出。相貌俊俏、成績優異、身邊不乏女伴，更是運動團隊的隊長⋯⋯這樣的一位男同學，似是人生勝利組，亦是Zelos（黃凱逸）年少時期的寫照。

這位看似十項全能的男同學，漸漸意識到自己原來習慣只做有把握的事，看似威風凜凜，實質卻是膽小又渺小。幸好，Zelos沒有因著這種「輸唔起」而故步自封，數年前大聲宣告過喜歡男生後，他驟覺「呢個世界冇嘢可以封死我」；於是不論在音樂風格還是電視節目上，都展現出其牙尖嘴利，充滿個性的獨特一面，推出意識相對大膽的首張專輯《EmergenZy》，重新演繹性別的流動。

當大家以為Zelos會繼續朝向gay artist這條道路進發，他卻交出《ZILLOW TALK》這張曲風柔和的新專輯。笑稱自己是「做作小文青」的他，這次收起了先前的棱角，選擇坦露他多愁善感的內心一面。

但原來，這樣一張極其溫柔的專輯，在別人眼中卻依舊大膽：「我啱啱出呢隻碟，拎去派台嗰陣，大家第一個反應都係覺得我好大膽，然後我話『今次又大膽咩，之前啲歌除晒衫你話大膽，今次又大膽？今次唱香港人最鍾意聽嘅慢歌喎。』」隨後，Zelos才發現，在今時今日這個單曲年代，選擇把九首風格相近的歌曲，一次過塞進一張專輯，原來是另一件很另類的事——「原來我唔小心做咗大膽嘅事。」

一張整理內心的專輯

《ZILLOW TALK》的起點，是2022年的一趟英國之旅。Zelos形容那個時期的自己只管拼命工作，沒有餘力照顧自己，忽視內心的疲倦之餘，卻又彷彿看不見成果，極度迷失。這趟英國行，使他對人生產生了許多問號，也寫下了數首歌，以音樂去抒發當時的不甘、憂慮與傷感，寫著寫著，便成為了《ZILLOW TALK》雛形，甚至在《EmergenZy》仍未面世的時候，這張新專輯便已經接近創作完畢。

《EmergenZy》與《ZILLOW TALK》看似兩極，卻同樣是Zelos最真實的面向：「我一開始都會擔心，擔心大家覺得我離棄咗以前嘅自己⋯⋯真係有好多人同我講『你唔係覺得人生好快樂、好proud㗎咩？你都會唔開心？』」但事實上，叛逆的是Zelos，感性的也是Zelos，他的本性就是喜歡在不同面向不同氣質上隨意轉換，不設限制：「我係真係一個好多變嘅人，我真係好用力嗰陣，人哋會覺得我好用力，到我真係好soft嗰陣，人哋又自然覺得我好soft。我從來都冇覺得，我係靠近邊一面多啲。」

回看《EmergenZy》時期，Zelos直言當時青春無限，正值一個很性感的狀態，已做盡當時可以做到的事：「原來你可以咁 gay，都有人鍾意，原來你真係可以用呢個lifestyle，或者呢個attitude，都會有人覺得你好玩。我諗嗰陣我係重新得到咗啲力量。」但此時此刻，他想先把節奏慢下來，梳理一下內心的眾多想法，專注做慢歌。

提起慢歌，Zelos繼續笑著分享：「其實我本身係一個慢歌底嘅人，就係好鍾意唱慢歌。我係cantopop嘅忠實粉絲。我會記得邊個人寫邊首歌，邊個人填邊份詞，係邊個編曲，係邊個監製⋯⋯我好鍾意cantopop情歌，我係嗰啲多愁善感、傷春悲秋嘅男人（笑）。」

Zelos補充，自少年時期開始，王菀之與謝安琪一直是他的偶像。一個使他知道藝術家原來也可以很落地、很活生生；一個則領他走過高峰人生低谷人生，猶如一位伴他成長的大姐姐。

由床邊傳至聽眾耳邊的呢喃細語

「我好識同自己傾偈，但我越嚟越發現，你唔同人哋傾，咁就算幾認識自己都好，你都會走失。因為你同自己對話，有時唔會真係開口講，但如果你同人哋傾，嗰個討論先係真正從你隻耳聽返入腦，你先知道自己講緊咩。我覺得分享係幫助自己組織、刺激思考，好似幫個腦做運動⋯⋯所以我好少收埋。」

越是長大，越了解自己，Zelos便變得越坦白，越願意表露自我。《ZILLOW TALK》這張專輯，他形容所有歌曲都通通指向自己，所以儘管有著「Pillow Talk」之意，說到底，其實還是以與自己的對話，以最私密的枕邊細語，勾起大家或感傷或平靜的共鳴。

「當你咁啱有啲經歷，係你真正體會到嘅感受，原來寫出嚟嘅嘢就係咁自然，例如〈你說我說〉，兩秒寫完，但好多人都好鍾意⋯⋯我突然覺得，原來一啲最個人、最親身經歷過嘅嘢，原來呢個世界唔係冇其他人經歷過，原來好多人都比你早經歷到，或者經歷更深刻⋯⋯當佢哋聽到呢首歌，就會追溯到當時嘅感覺。我覺得係好神奇嘅事。」

Zelos笑言，自己是個傷心時更會聽悲情歌，盡情浸淫於傷感氛圍的人。所以在這張每首歌都使他感到自豪的專輯裡，他還是最偏愛〈雨點〉這首歌，尤其是在梅雨天收聽時，便會覺得份外揪心，聽進心坎。

心的車站 也許沒有終站

《ZILLOW TALK》的主打歌是〈心的車站〉，當問到Zelos的「心的車站」在何處時，他卻回答這是個會隨時轉換之地，永遠不是終站：「我知道自己想去邊，我知自己點樣先會舒服，我呢刻係知道。但我都好肯定，當我真係去到嗰個狀態，我係唔會舒服，因為人會不斷改變⋯⋯但我呢一刻，就真係好想當大家諗起我呢個人，係會諗起一首歌。我覺得咁就會係我嘅代表作。」

心的終站，也許難以真正抵達；至於「幸福」這一站，Zelos倒是認為大概經已到達。

「我覺得幸福就係可以keep住做到自己想做嘅事。唔係諗你做嗰件事要做得有幾好，當然做得好、做得成功會開心，但原來你可以保持到，為自己想做嘅嘢去付出努力，已經係一種祝福。」Zelos坦言，自己也試過感到沒有出路，似是真的要放棄的階段，所以才會更明暸這種為著心頭好用力打拼的幸福。

在Zelos眼中，幸與不幸，也許都是來自音樂。做到想做的音樂，且可以藉此維生，固然是一大美事；可是他又覺得自己的「音樂路」，好像走得比「演藝路」緩慢：「之前突然有ViuTV節目拍，人哋覺得我做主持做得好，覺得我牙尖嘴利、訪問犀利、轉數好快，但其實好少人真係覺得我音樂做得好。」然而，Zelos也確實相信自己離幸福不遠，也許只是最好的作品尚未來臨，尚在路上。

最後，Zelos分享了一首能夠為他帶幸福感覺的歌曲——許志安的〈晚安〉。他笑言這其實是一首很sidetrack的作品，可是又覺得與《ZILLOW TALK》的氣質很類近，甚至可視它為專輯的「延伸閱讀」：「聽完〈睡床〉後再聽〈晚安〉，呢個狀態，我就覺得好幸福。就係你可以好好咁，同枕邊嘅人講一聲晚安，然後一齊瞓覺。」

▼Follow 18/22

Instagram: https://www.instagram.com/1822hk/
Website: https://www.18-22.com.hk/
YouTube: https://www.youtube.com/@1822hk