嘈老闆IG｜李澤鉅話齋場仗咁打法息口點會跌｜曹參國

長實主席李澤鉅在業績會後向分析員表達的意見：「如果中東戰事持續的時間比市場預期更長，各地經濟體的通脹都會進一步升溫，利率亦難以回落。」

曹老闆睇完呢句，真係忍唔住要拍吓手掌。李生就係李生，講嘢永遠唔單止有紋有路，仲要一針見血到肉。你班分析員仲日日喺度估美國聯儲局幾時減息，諗住今年下半年有得唞吓氣？睇嚟呢場仗咁打法，息口點會跌呀？真係天真過天真嬌。

首先，我哋要講吓特朗普嗰套「縮沙TACO」策略。大家記唔記得佢本《交易的藝術》？入面嗰套做生意嘅哲學，就係永遠都開天殺價，令對手手足無措，從而搵着數。但係呢種策略喺國際格局政治裏面就未必每次都成功，好似今次對住嘅對手伊朗係波斯文明古國，係金傭小說裏面拜火教呢啲神奇武功高強嘅民族。而家人哋個革命衛隊係用清真寺嚟做單位去管理成個國家，層層滲透鞏固，就算派幾多陸軍作戰部隊去到佔領，都只不過係跌咗落伊朗已經準備咗幾十年嘅防衛戰。你話點打？呢啲唔係做生意，係打泥漿摔角，越陷越深。

咁呢場仗打落去，最直接嘅影響係乜？就係通脹。通脹呢家嘢，係一種連鎖效應。首先中東一亂，油價就唔使旨意跌。石油係百貨之母，油價一升，運輸成本、原材料成本全部跟住飆。跟住到石油副產品天然氣、肥料，又會推高食物種植成本，再傳導到飼料、牛肉、雞肉、雞蛋，最後全部輻射返去美國。你話聯儲局見到呢啲數據，點敢減息？佢哋驚通脹失控驚到震，仲邊有空間放水。

所以，李澤鉅話利率難以回落，絕對係睇到晒成個棋局。佢嘅潛台詞就係，唔好再發夢今年會減息。息口喺高位企硬，香港想嚟個V型反彈？慳啲啦。呢場仗打得越耐，美國越冇得減，香港要跟住美國條隊行，聯繫匯率之下，香港嘅利息成本都只會繼續高企。

咁問題嚟喇，香港係咪好似啲高級官員咁講，可以喺戰爭裏面食到人哋啲水呢？即係中東啲錢會嚟香港避險？曹老闆就真係要問吓香港政府，上一次批准喺香港起清真寺係幾多年前嘅事？香港呢個所謂包容嘅城市對於伊斯蘭文明又有幾咁友好？中東嘅錢係咪即刻嚟？我就唔好咁樂觀。因為伊朗可以走嘅錢一早走咗，而家想走嘅係中東其他國家嘅富豪，佢哋喺全地球嘅選擇比俄羅斯嘅富豪多得多。倫敦、紐約、瑞士、新加坡，邊個會排住隊嚟香港？仲有，如果美國唔減息，香港嘅聯繫匯率制度下，資金成本咁高，邊個會將大筆資金泊嚟一個息口高嘅地方？

總括一句，李澤鉅呢番說話，唔單止係講緊宏觀經濟，直頭係同香港班投資者打咗支「預防針」。呢場仗嘅打法，注定通脹難落，息口難跌。香港想喺呢場亂局中「食水」，恐怕首先要問吓自己，有冇真正做好準備迎接中東嘅金主，定係只係一廂情願，最後連自己嘅經濟都要睇定啲先？曹老闆話齋，呢個年頭，坐喺度等運到不如諗吓點樣自保，息口咁高，現金為王，仲想借錢炒樓炒股？小心變咗「燈神」呀！