《我談的那場戀愛》有笑有淚嘅另類愛情電影

《我談的那場戀愛》上星期正式上映，係一部有笑有淚嘅另類愛情電影。大家可以放心入場，盡情投入喺依場戀愛遊戲。
(以下有劇透)

「早安 去到 晚安 習慣向你宣告 歸家了你卸妝 瑜珈過後著睡袍」

首先，我睇完第一感覺係超鐘意套戲個vibe！敘事同人物簡單，集中建立兩個寂寞人互相陪伴療癒，似愛非愛嘅關係，無咩多餘枝節，對白精警獨到，攝影服裝美術都非常出色，拍得好有感覺。

故事加入喜劇元素，設定特別，浪漫位同一般愛情電影唔同，但異常觸動人心，有幾幕我睇到眼泛淚光。

「願你安好 願我也安好 若沒法一起 卻感受到 最簡單的美好」

先係君如喺廁所整親，誤打誤撞收到MC來電，雖然隔住電話，只聽到呼吸聲，但喺最無助嘅時候有一個陪伴，係特別溫暖窩心。

之後到咗日本，佢地背對背把酒談心，再喺列車上靜靜相依，少年默默以另一個身份守護笑琴，體現出一份愛。

幾段對白都唔多，但氣氛營造簡直世界級，彷彿世界只剩下兩人，配上唯美畫面，真係浪漫到一個點，估唔到一段稱不上情侶嘅虛擬關係可以如此動人。最後大家信守約定，重聚一刻搞笑中其實滿是感動。

「緣份那地圖 畫下你的瀑布 無人能找到 你與我知道 夢裡散落過的 在被鋪」

故事中依段關係雖然係騙局，但的確做到一場戀愛有嘅元素。每日用文字陪伴你，分享生活喜與悲，一句問候已經會感到甜蜜窩心，甚至從中搵到自我價值，解開過去心結，逐漸令人失去理性。

反觀現實中嘅愛情，其實同樣會呃呃氹氹，雙方總會展示自己最好嘅一面，隱藏一啲缺點或者過去，大家某程度上都係各取所需，同戲中段關係的確有幾分相似。

導演對愛情嘅反思有趣又發人深省。何謂愛情？你信就係愛情。

「晶片自製記憶 幻覺變得親暱 當進入某角色 尋找鏡內去慰藉」

演員方面，吳君如真係太神了，笑戲顧然得心應手，感情戲更加一下子牽動你情緒，將失去伴侶嘅中女個種孤單空虛，再逐漸被少年填補嘅心境演得淋漓盡致。佢地依對虛擬情侶亦意外地合襯，睇得舒服又動人。

MC就由一個頹廢少年誤打誤撞成為詐騙高手，過程中慢慢開始著緊對方，自己亦因而改變，演得頗有驚喜。再者，電影用咗唔少voice over，配合彼此只可隔住螢幕交流嘅感覺，MC辨識度高又靚嘅聲線正正係天作之合。佢唱嘅主題曲更加係錦上添花，喺電影完結後將情感繼續喺內心醞釀。

另外，Stephy嘅造型將佢嘅美貌同氣質完美展現，出場唔多但令人深刻，每幕都靚到癲！

「但願你聽到 命運也許太糊塗 願你找到 預約那小島 毋用看地圖 日後也可遇到」

總括而言，《我談的那場戀愛》各方面都相當出色，睇完好似談咗一場戀愛，絕對係我近年最喜歡嘅港產愛情電影。何導演第一部作品已經咁成熟又有特色，希望快啲開到下一套戲！

「無人能找到 你與我知道 夢裡對望過的 又碰到」

PS小編有幸參與咗依部戲一個小小嘅部分，喺credit list見到自己個名感覺神奇又開心，同時感受到製作一部電影實在唔容易，所以私心更希望票房會大賣🙌

▼Follow hkpopculturelover
Instagram: https://www.instagram.com/hkpopculturelover/