何漢權喚校長多收內地生：門常開好過夜繽紛
【獨媒報導】書展踏入第二日，全國政協委員兼教育評議會主席何漢權推出新書《教育，情意在心間》，下午與同為全國政協委員、香港聖公會教省主教長陳謳明出席座談會，全場約150人幾乎滿座。何漢權在會上將任職訓導主任比喻為「公安部部長」，又建議在座的校長多取錄內地生，因為「佢哋好徬徨嚟到搵學校」，稱讚他們中文及數學根底好，只要花時間追上英文程度，成績就會突飛猛進，更稱「門常開是必須」、「好過夜繽紛」。
任訓導主任比喻為公安部部長
現職國史教育中心（香港）校長的何漢權為資深教育界人士，他表示教學分為言教和身教，但認為「言教可以老老實實吹出嚟，你講乜都得。男追女呀，甚至宜家好鍾意女追男呀，你把口最緊要。」他又指﹐身教亦很重要，自認「有好多好多嘅缺點」，又將自己任職訓導主任比喻為「公安部部長」：「做老師做校長咁多年，我由做公安部部長，公安部部長知唔知係咩？即係訓導主任。」引來台下一片笑聲。
他指任訓導主任時，習慣站在校門外迎接學生上學，即使後來當上副校長及校長後，仍會維持這個習慣。他解釋，自己不只是迎接學生，更要迎接老師，強調身教要由心出發，所以新書名為《情意在心間》。
陳謳明則談到基督教的信仰中，教育是一個憲制，情和意注重心性，「見到周圍嘅同事或者相關嘅同工，點解佢哋教書，即係進入教育工作咗一段時間之後呢，好似慢慢冇咗一個心性同情意喺裏面。」他相信每人進入教育專業時，一定有理想，但隨時間過去卻被其他價值取代原本心性的價值。
批港生欠發問能力
主持提及昨天中學文憑試放榜，何漢權點評香港學生缺乏發問的能力，並且「冇咗一種去獨立自我，即係有啲自己睇法嘅一啲表達，或有唔同表達嘅能力」。他續指，香港教育系統使社會有強烈的競爭文化：「家長會比較，學生會比較。」無論文憑試成續優異與否，亦要幫助家長和學生處理情緒問題。
何漢權又提到現時考試制度的不足，指現時人工智能（AI）技術發達，「如果今日仲係用information嚟考佢哋（考生）記憶，其實已經係落伍到不得了，其實既然好快AI可以俾到好多solution嘅時候，突顯咗現時考試系統嘅不足，我哋要嘅answer唔係咁重要喇。」他認為發問的重要性在於知道學生的思考過程。
倡多收內地生：門常開好過夜繽紛
何漢權之後舉例稱，如兩個成績相若的學生，一個本地生，另一個內地生，建議在座的校長取錄內地生，因為「佢哋好徬徨嚟到搵學校」，並指現在仍有為內地生配對學校。他續稱：「初時佢哋（內地生）嘅英文雖然未必係趕得上，但一般嚟講，啲數學好勁嘅，中文唔洗考㗎喇，咁嘅話俾一年時間佢，佢馬上上㗎啲成績。」他重申，若要顧慮考試眾多因素，「嗱嗱臨收咗佢啦」，強調錄取內地生對香港人才庫有幫助，更稱「門常開是必須」、「好過夜繽紛」。
版權: 禁止衍生
留言 41