Jeremy同AL做「老Best」　唔怕Edan同佢爭

人氣男團MIRROR成員Jeremy（李駿傑）的首次新碟簽唱會，之前因懸掛10號風球而要延期至今日（24日）假寶琳舉行，吸引數百粉絲到場支持，人數之多逼爆商場。Jeremy除和6位Dancers跳唱歌外又跟粉絲玩遊戲，期間尖叫聲不斷，氣氛熱鬧。Jeremy在簽名前訪問，坦言驚簽唱會再度受天雨影響，自言是雨之子，之前離港旅行也遭黑雨，幸好今次可順利完成，他謂：「啲粉絲話貴人出門招風雨喎！」

談及早前和隊友Anson Lo（AL）到日本5日旅行，他表示志在Hea，沒有大出血，又謂經常和AL結伴出遊。談到AL擔任另一隊友Edan演唱會嘉賓之餘，又睇騷陪足3場，而Edan更指AL是其最好朋友，笑問Edan跟他爭AL，他即問：「佢咪同我爭？佢都係我best friend嚟嘅。（同你去旅行，你贏！）沾沾自喜添，佢旅行同我去呀。（可會呷Edan醋）？睇吓呂爵安（Edan）點補償番我啦，講笑啫，（Edan冇請你做嘉賓喎？）我覺得個騷係佢嘅，嘉賓係由佢決定，唔應該因我係佢friend就一定請我做嘉賓，佢做乜都支持。」

他又謂有叫Edan同去旅行，但他有工作，或之後再相約其他成員一齊旅遊。問Edan曾跟AL哭訴，他就話有和Edan聯絡分享近況及不開心事，但Edan沒跟他喊過，他又覺得人生定有煩惱，作為夥伴可互相傾訴分憂，只是Edan的感情事，自己就不清楚，連Edan緋聞女友林明禎陪Edan母親睇騷也不知。

Jeremy9月8日就30歲生日，他喊驚話：「好怕3字頭，到時會同粉絲搞生日會，自己就食飯慶祝，隊友都約咗我食飯，但未知有幾多人，都想去旅行，想去希獵，但冇假，一個人去又有啲危險，生日願望係嚟梗嘅嚟梗嘅演唱會順利，多啲機會見到大家啦，仲搞緊新歌，（想唔想似紅過羅湖嘅姜濤發展內地市場？）無論內地，外地都有觀眾，我哋做好作品都想畀多啲人聽。」又謂之前Stanley生日，獲對方邀出席兩次，感覺好巴閉。又問到可和新任高層金廣城見面？他形容對方為長官，他直認已開會傾未來發展，要求可達成就要看日後他的新發展。

問到他愛旅行，可考慮開拍旅遊節目？他即笑指怕悶死觀眾，也曾想過以小組形式齊去旅行，但沒自信單飛拍一個旅行節目，不過可以嘗試。

早前姜濤在澳門拚盤騷上跳唱其歌曲《半》，他指有看直播，戥姜濤緊張：「佢做得好好，我好感動，佢將一個咁大咁好嘅舞台分享畀我哋，用我哋嘅歌去做一個表演。」提到藝人林建明在訪問中指姜濤因身體狀況或食藥而影響身形，他表示不知，但覺得姜濤瘦了，又指姜濤很自律和勤力食健康餐及做運動。

提到姜濤以旅行、打波及遊車河減壓，問他可曾任姜濤乘客？他想了片刻謂：「夠膽嘅，因為我試過第一次坐呂爵安嘅車，係有小小驚，我諗如果我揸佢哋會仲驚，因為我好耐冇揸。」

東網網站 : https://on.cc/東網Facebook專頁 : https://www.facebook.com/onccnews/