姜濤唱好陳百強撐廣東歌　AL自認小薯係國影影星都想合作

男團MIRROR兩大人氣王姜濤及盧瀚霆(Anson Lo）昨晚（21日）聯袂許廷鏗、陳柏宇和COLLAR成員Candy與Ivy等，雲集啟德綜藝館參與一個廣東歌慈善演唱會，吸引大批粉絲到場追星，場面熱鬧。場館內姜濤與AL粉絲人聲鼎沸，幾乎遍布每一角落，雙方應援燈不時形成一片亮眼燈海，而開場前姜濤粉絲更於場館外影大合照，聲勢浩大。

AL登場獻唱了自己歌《Megahit》及《你都有今日》，席間形容廣東歌陪着自己長大，度過開心與不開心的瞬間，如今想藉此傳遞正能量給大家。壓軸出場的姜濤特別選唱了已故歌手陳百強名曲《等》，又與陳柏宇合唱《夕陽無限好》，他坦言出道前對廣東歌了解不深，如今覺得身為歌手責任很大，要將廣東歌承傳下去，並打趣叫台下觀眾：「同身邊嘅後生仔女講多啲（廣東歌），我哋一啲都唔後生，MIRROR個個都30喇！」

事後兩兄弟齊齊受訪。問到姜濤特意選唱《等》，他直言自己與媽媽都稱得上是陳百強粉絲，《等》更是其心水歌單。提到去年王晶曾批評他「人肥歌雞舞賤」，日前再形容陳百強音域窄，可謂到處辣着火頭，姜濤O咀表示：「有咁嘅事？我冇了解過喎。（你咁細個都鍾意陳百強？）我都唔細啦，27喇！咁細個都聽屋企人播佢嘅歌，耳熟能詳。」

至於AL於英語劇《The Season》內與木村光希大演對手戲兼角色關係曖昧，他透露：「我戲份唔多，客串演番自己，但喺戲內嘅我有好多名人朋友，係一個好有經驗嘅歌手。我同光希就有場戲親密少少，大家有啲好感，但又唔係太多，所以排戲時都傾咗攞個Balance，唔好做多咗。（戲外你啲咩多？）食嘢，因為開工我冇點食嘢，好想了解光希食啲咩，原來佢咩都食。」他又指今次最難忘是拍攝一場歌舞場面：「嗰場戲好得意，好似有小小百老匯Feel加小小音樂劇元素咁。」

問到倘若再有類似機會的話，最想與哪位國際級演員合作，AL笑答：「我呢啲小薯，有得拍邊個都想合作，有機會都想一試。」身旁姜濤即提議剛有新劇推出的韓星Jisoo，又提到隊友Stanley，搞到AL接口：「Stanley唔係外國喎，佢係香港大前輩，ViuTV影帝，仲係電影界超級新星。」令全場忍俊不禁。姜濤則坦言羨慕AL有機會拍英語劇：「講英文呢啲我不嬲都好差，真係好想練好啲。」

而姜濤剛完成英國巡唱，自爆未有時間為MIRROR團歌錄音，要待完成加拿大站演出後才走進錄音室。至於有網民發展他頭頂髮線分界明顯，疑似用髮片增加髮量，擔心他有脫髮問題，姜濤大方回應：「我成日夾髮，都要留意吓，食乜可以保養？注意吓啦，應該冇事啩？！」

另外，提到隊友Jeremy、Jer及Edan早前相約佘詩曼竹戰，問到AL為何沒有參與，他笑答：「我渣，未去到嗰個Level可以同大家打牌。（你輸畀佢哋？）我渣，但會贏錢，佢哋唔會同我玩，成日覺得我打得慢，同埋我唔識造牌，又聽唔明佢哋嗰啲打牌術語，等我鍛煉吓先啦。」

東網網站 : https://on.cc/東網Facebook專頁 : https://www.facebook.com/onccnews/