《那一天我們會紅》劇評　新鮮班底拍出一部優秀作品

《那一天我們會紅》上星期終於畫上不捨句號。故事題材新穎，以充滿新鮮感嘅班底，拍出一部優秀作品。
（以下有劇透）

「無需燈光與佈景 當天你我放肆做夢 靠熱情」

劇集節奏快，脈絡清晰，拍出唔同人喺網絡世界追夢嘅旅程，有抽水搞笑，有諷刺反思，看似胡鬧極端，但又會見到現實嘅影子。劇情發展同網絡世界一樣咁快，過一集又有新話題，每條線都開得自然又收得合適，選角同對白都非常大膽。

「難得我耗光一世努力才放棄 曾花過力氣不過未令人銘記」

劇中探討咗網絡世界，以至整個娛樂圈嘅生態，非常貼地。近年太多Youtuber同KOL為咗流量不惜一切，比人感覺劣幣正驅逐良幣，可惜創作者只能無奈接受，畢竟流量等於收入，要走下去就要被迫跟隨。

依個行業可以讓你揮灑熱血，同時會帶嚟眾多無力與打擊，就算開始受到尊重，同樣要面對更多挑戰與批評，再難捱都要再接再厲。

「風聲蕭蕭穿梭到海邊 顫抖海鷗飛走 難重遇見」

《殺人回憶》依個伏線亦係世界級，每句惡意留言都係逐步推緊一個人落深淵，某一日我地雙手可能會沾上鮮血。緊記網絡背後，所有user都係有血有肉嘅人。

「能爽快結束需要豁達和勇氣 誰保證熱血可兌換動人結尾」

除咗劇情，劇中每個角色都塑造得相當立體，睇到佢地嘅掙扎與成長。

當中以況哥最令我深刻。一開始覺得佢幾黑人憎，慢慢發覺站喺佢立場，所有行為都正常不過，佢只係維護自己嘅心血。可惜有時太自我，太在意個channel，反而本末倒置，傷害咗身邊人。

而主角們都係近年冒起嘅演員，好幾位更加係第一次拍電視劇，但完全無稚嫩嘅感覺。再加上有一班經驗豐富嘅配角帶領，特別係admin同bobby，戲份唔多但依然搶鏡。成班演員夾埋一齊實在太好睇！

應導總算吐氣揚眉，證明自己有能力拍出佳作，依個故事仲有唔少發揮空間，如果未來有續集就正了。

「情歌有我的失意信念和過錯 誰都跌入某些騙局換來重挫」

香港YouTube界，甚至港產片近年都面對唔少挑戰，但我深信真金不怕洪爐火，兩個媒介係可以相輔相成，觀眾絕對會支持用心又有質素嘅content creator。網絡世界或者好黑暗，但絕對有光輝一面，希望大家多艱難都唔好忘記初心，繼續走依條荒亂之路。

「集結幾多支持 任你怎麼禁播 夢裡當天我有快樂過」

▼Follow hkpopculturelover
Instagram: https://www.instagram.com/hkpopculturelover/