香港政府試用港版ChatGPT 數據庫有本地及中國特色

早前有傳OpenAI連ChatGPT的API都會禁用，但唔緊要！我地仲有有一班政府菁英！創新科技及工業局長孫東話香港政府已經成功研發咗港版ChatGPT，個數據庫唔只係政府自己一手一腳建立出嚟，仲有佢嘅特別之處！

創新科技及工業局係上年曾經表示考慮到資訊保安風險，所以ChatGPT並冇喺政府內部被使用。近日，孫東接受電視台採訪，透露港版ChatGPT已經研發成功，更命名為「公務員文書輔助系統」，佢仲強調個資料庫係由政府自主建立，最重要嘅係，數據庫加入咗香港同中國嘅特色。

不過局長就好似冇講明香港、中國特色既內容係啲咩啦。當局喺年頭開始訓練系統，去到依家已經喺局內正式試用，進度良好啊！當條件許可嘅時候，就會提供全個政府使用，提高公務員嘅工作效率。當局仲希望遲啲可以推出俾業界同市民使用。唔知大家又期唔期待港版ChatGPT嘅推出呢？