重生後的牛一，沒有蛋糕，但有澳洲和牛的燒肉放題!

又到我的巨蟹座生日月，今年生日飯去咗食燒肉火鍋放題，地點在旺角家樂坊樓上的八歌仙，並沒有食生日蛋糕，郤以澳洲和牛來慶祝牛一，慶祝自己進入新階段。

作者: 飛叔

生日食放題都並非第一次，只是過去有幾年都頗隆重，今年經濟唔好呀，唔去Fine dining了，其實生日又不是什麼大件事，慳返些錢簡簡單單地同摯友食個飯已經好好了，於是我提議食放題，並揀了一間算幾新，開張幾個月，位於旺角家樂坊商廈內的「八歌仙」。

商廈內同一樓層，以前幫襯過賣摩洛哥泰國菜的Morokok，跟八歌仙同一集團，同Group還有荔枝角D2 Place的Thai-ger及Little Break Coffee & Kitchen等。

都係為咗幫朋友慳錢，見餐廳平日9點後有75折(週末85折)，我們又不介意夜點食，便訂9點鐘限時120分鐘的燒肉放題。

八歌仙環境得非常日式，仿竹林的和風佈置，雖然一看就知是假的，打理得仍很整齊。

店內的座位間格很寬濶，不似一般放題那麼迫。

說是燒肉放題又並不全對，皆因這店同時是做火鍋的，即是一個價錢可以同時食火鍋和燒肉兩種放題。價錢方面，最平的套餐300幾，但不包刺身和前菜。要食所有食物的話，就揀$498的澳洲和牛，或$688的態本和牛。要慳錢嘛，$498已經好足夠了，另外每位加$48就可任飲無酒精飲品。

刺身拼盤

這店以QR code落單，但刺身就是店方直接送的。對放題店的刺身從來沒有期望，因此沒有失望，水準算正常，只是款式實在少了一點，唔該俾多幾件啦喂。

放題店亦無謂多吃壽司，這碟是朋友點的，我沒有吃，只是看來並不太差。

火鍋

火鍋湯底有五種選擇，選了鰹魚昆布和黑蒜豬骨，其實這晚點的九成食物都是燒肉，食火鍋的時間好短。

澳洲和牛

供應的澳洲和牛以M7和M9為主，部位包括: 西冷、肩胛、牛三角、牛板腱、牛小排、牛外腿、牛背峰，日本和牛就有A5和牛三角。

除了牛背峰唔知點解漏點外，其他在餐牌內的牛肉都有點選。

牛肉切得算幾仔細和準確，端上時亦有每款放著名稱牌仔，觀感比一般放題店來得高檔。

咁多款之中，我最喜愛油花細密的牛三角和牛肩胛，燒起之後亦是油脂四溢。

澳洲和牛比日本和牛來得濃味，其實更適合吃燒肉。

除此之外，還叫了牛舌、五花腩片、鹿兒島黑豚梅花腩等肉類，質素算十分不錯。

海鮮就吃過扇貝、清酒醉蝦、香草牛油廣島蠔，只是普通貨色水準。

吃那麼多肉，點可以少蔬菜!

除了大路的粟米、露筍、茄子、番薯等，最難得的是有冰菜，只需輕輕一淥，好清甜爽口!

甜品就只是每位一盒Haagen-Dazs雪糕!

沒有生日蛋糕，就拿著牛肉就拍照啦，一樣可以許願啫!

生日敢言:

過去一年，我的人生非常多起跌，仲跌得好傷，之前都在網誌及個人Social Media分享過那次嚴重交通意外的事，想知就自己睇返啦。現時已痊癒九成，行得食得，活動自如，自覺已經好幸運了。

重生之後，今年生日沒有什麼大志願，只想往後的下半場可以做自己喜歡的事，不受束縛地想做就去做，開開心心地過日子!

八歌仙

地址: 旺角登打士街56號家樂坊8樓802號舖

電話: 23287303

營業時間: 12:00 – 23:00

請關注飛叔平台:

Facebook專頁: 飛叔生活 Kelvin Leung

Instagram: kelvinyfl

YouTube: 飛叔Kelvin Leung