梁詠琪善心滿載 重啟「小黃花影院」 請基層家庭睇戲

由梁詠琪（Gigi）、李心潔、楊采妮、許茹芸一起創立的「小黃花慈善基金」，自2007年成立以來，一直不遺餘力幫助社會上弱者社群，每逢暑假，Gigi更會為基層學童安排不同類型活動，當中舉辦了多年的「小黃花影院」，會安排父母與子女到戲院欣賞暑期動畫影片，享受天倫之樂，但年前因為疫情，加上Gigi忙於世界巡迴演唱會而無奈停辦，但在剛過去的暑假，雖然忙於為電影《無名指》宣傳，但Gigi仍騰出時間，以「小黃花慈善基金」創辦人身分，與「香港基督教女青年會」合辦「童心同行 光影同樂」電影分享會活動。

當日來自女青年會五個不同的地區中心、合共62個基層家庭、由父母帶同子女超過200人，到九龍灣一間戲院觀賞《多啦A夢：大雄之繪畫世界物語》。

Gigi說：「雖然疫情期間，『小黃花』冇辦法舉行暑期活動，但嗰段時間我哋都有幫手籌集消毒用品、口罩、快速檢測包，捐去唔同嘅機構，因為當年呢類用品供求都好緊張，尤其係好多基層家庭，好缺乏呢方面嘅資源，所以『小黃花』都希望可以出一分力，幫助有需要嘅人。」

疫情過去，今年終於可以復辦「小黃花影院」，Gigi心情份外興奮，她說：「一家人買飛入場睇戲，看似微不足道，但好多家庭未必有呢個經濟能力，能夠喺暑假，小朋友最開心嘅日子，有爸爸媽媽帶住一齊去睇戲，係一件好開心嘅事。」

當日Gigi穿上鮮黃色的「小黃花」會Tee，提早到達戲院迎接這班「特別嘉賓」，她更站在戲院門口，向每一位小朋友送上多啦A夢貼紙，令他們十分興奮。為答謝Gigi與「小黃花慈善基金」贊助現場200多位基層家庭成員可以入場睇戲，女青年會五個地區的青少年綜合服務中心，各派出一位小朋友代表，向Gigi致送由他們親手造的紀念品。

正投入新戲拍攝的Gigi，回想當日眼見父母與小朋友可以入場睇戲歡樂畫面，令她更加想明年暑假，籌辦更多不同類型的活動，「今年除咗『小黃花影院』，我哋仲有贊助一班有學習障礙嘅學童，幫佢哋搵老師學習跳街舞，但我覺得係未夠，希望明年暑假，『小黃花』可以舉辦多啲活動，讓更多有需要嘅小朋友受惠，等佢哋可以過一個有意義、充滿歡樂回憶嘅暑假。」

（即時娛樂）