《Concord》太「政確」劣評如潮！ S ony8年心血打造推出 2週極速下架

《Concord》（星嗚特工）經歷8年開發、Sony Interactive Entertainment 耗資1.5億美元， 這款線上多人射擊遊戲喺 8 月 23 日推出，上線短短兩星期後，就突然對外宣佈會喺 9月6號關閉伺服器並全面下架，所有平台遊戲玩家均可獲得全額退款，有玩家甚至將呢個遊戲譽為「史上最短命嘅遊戲」。

《Concord》是一款 5 對 5 多人連線射擊遊戲，注入咁多資金同埋時間所開發嘅遊戲，其實早喺公測嘅時候已經唔太受歡迎，亦得到唔少劣評。主要原因除咗係遊戲形式冇乜新意，武器、特性等，亦熟口熟面，最大鑊係角色設計被評太「政確」，唔靚仔靚女，冇型冇款，仲有大量「反歧視」嘅特質，好難吸引玩家玩，亦冇乜吸引力令玩家幫角色換裝。

原本都有玩家預期遊戲會喺公測後有所改進，正式推出時會比較吸引，但結果喺八月上線嘅時候繼續未能吸引玩家關注，之後亦繼續批評不絕。加上《Concord》在Steam平台的售價為40美元，而目前市面上已經有好多類似嘅免費射擊遊，吸引力自然更低。

《Concord》推出至今只係售出2.5萬張，在線上遊戲平台Steam最高同時在線人數得697 人，之後更加係每況愈下，單日更加突破100人以下。因以上嘅成績，隨後《Concord》開發商Firewalk Studios遊戲總監Ryan Ellis喺PlayStation官方發佈聲明表示，遊戲推出以及不少部份都沒有符合預期因此決定由9月6日起將遊戲下架，亦都會關閉伺服器，後續會探索其他吸引玩家嘅方式。

Sony公告中強調，佢哋會為所有購買《Concord》玩家提供退款。使用 PlayStation Store 或PlayStation Direct 購買嘅玩家，將會根據原付款方式退款，處理時間預計 30 至 60 天。Steam 和 Epic Games Store玩家都將在未來幾天收到退款確認，其他零售商購買實體版本的玩家則需聯繫對應的銷售商進行退款申請。

有唔少玩家都話《Concord》有呢個結果完全係意料之內，亦有網民抵死咁話，如果買咗實體game不如唔好退貨，當收藏品，「記念」呢款可能係史上最快下架嘅遊戲。

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/