娛圈單打︱中聲話題堅係多　刷新三觀冇唔妥

《中年好聲音》系列已成TVB王牌節目，即使《中聲3》早就播完，依然死唔斷氣，一時搞紅白大戰，一時又搞經典大戰，總之收視為王，只要仲收得，梗係要榨到汁都冇一滴剩啦。

嗱，剛播完嘅《中年好聲音321經典大戰》，齊集3季人馬演出，夠晒吸睛。之但係最多人討論嘅環節，並唔係一班「中123生」有幾唱得，而係破格植入式宣傳手法，刷新咗觀眾三觀！大家只見一眾唱將，拎住廣告客戶產品上台合唱陳百強嘅《有了你》，例如周吉佩拎住止痛退燒藥、古淖文拎住活絡油、黃博拎住藥丸，個個唱到七情上面；拎住礦泉水嘅譚輝智高唱「心中想與你變做鳥和魚置身海闊天空裏」，仲想咀佢一啖咁款，究竟手上呢支係礦泉水，定係當咗佢係拉姑呀？壓軸出場嘅車婉婉，索性拎住盒寫有「廣告招募中」嘅紙巾，網民驚問：「我睇咗啲乜？」問你服未！

編得出、做得出、唱得出，出位程度媲美呢排熱爆、因為「一胎生99子」、情節過分荒誕而慘遭下架嘅內地短劇《麒麟送子，天降喜福》！所以啫，邊個仲敢話TVB冇創意！

好啦，《中聲》話題點止咁少，今屆亞軍、來自馬來西亞嘅張與辰，一直粉絲多多「與辰同行」，深受媽媽粉喜愛。點知佢最近被爆已有同性密友，被指係同性戀。查實今時今日性取向已不是甚麼問題，不過張與辰事業剛上新台階，可能需要避忌啲。佢強調密友只係business partner兼十多年好兄弟，一直幫忙安排工作，叫大家咪誤會喎。相信粉絲都唔介意嘅，開心咪得囉。

東網網站 : https://on.cc/東網Facebook專頁 : https://www.facebook.com/onccnews/