俠醫｜張曦雯盡情麻甩演出搣甩女神光環　浮誇表情包一夜流出

TVB劇集《俠醫》昨晚（1日）首播，張曦雯（Kelly）飾演的Rachel羅穎琛，一出場以家居小背心加短褲上陣，全晚更放下靚女包袱，釋放大量「浮誇剩女表情包」，以麻甩演出搣甩平時女神光環，令不少觀眾大感驚喜！

《俠醫》第一集可謂張曦雯由頭帶到落尾，角色是做人做到亂晒籠、沒錢沒事業沒愛情的「Loser Rachel」，與以往女強人及知性女性角色有極大分別，表情舉止與以往有180度差異。難得Kelly放下靚女包袱，短短一晚釋放出大量「浮誇剩女表情包」，包括咆哮Look、「蛇呱」Look、混亂Look及弱勢Loser Look等。

張曦雯直認今次這個角色與真人大不同，「呢個角色同講嘢tone同我平時好唔同，所以我要改平時講嘢嘅方式投入去羅穎琛入面，變得要麻甩啲同local啲。」她指因過往大多演專業人士、有錢女的角色，因此很多人會質疑其能否演到此類角色，事實上演繹時亦有難度。「除咗麻甩之外，羅穎琛個人好大反應，但因為我平時比較chill 同埋冷靜，但呢個角色係少少嘢就會令到佢發癲同精神緊張， 而且佢嘅肢體語言都會多啲，不過係幾好玩嘅角色。」

張曦雯十分感激監製陳萍（April）給她機會演出，令大家見到其不同一面。「最初監製April同我講呢個曲髮造型，我已經好鍾意，因為我係從來冇試過， 我亦都覺得好襯呢個角色。」不過，原來這個曲髮Look對張曦雯而言，絕對是另一挑戰。「因為呢兩年我一直開工，又漂過頭髮同日日唔係弄曲就直， 我啲髮質都受損晒，所以最初都擔心日日整呢個曲髮， 最驚啲頭髮會唔會甩晒，幸好最終冇事。同埋，因為天氣又濕又熱，加上我頭髮好直，每次外景要整3至4次先保持到連戲，都係一個挑戰。」