《三命》稱得上神劇　一個平凡人三段不平凡故事

萬眾期待之劇集《三命》，以電影級製作，講出一個平凡人三段不平凡故事，絕對稱得上係神劇。
（以下有劇透）

故事以年青時一個小小嘅選擇開始，一步步走出三條差天共地嘅路。

面對同一處境，三個身份嘅取態同做事方式，以至與其他角色嘅關係都截然不同，但角色本性依然不變。好似信仔三條線同樣有份固執，就算有時比較衝動，但內心仍然善良；阿龍一樣義氣當頭；阿勤一直不離不棄；信仔媽媽都係對信仔咁好，對老公一往情深。

整套劇帶出頗重嘅無力同孤獨感，不論親情愛情友情，每條路都有各自嘅難題與掙扎，氣氛相當憂鬱。難得順暢少少，又會突然一沉，同人生一樣大起大落，充滿戲劇性。

結局更有種難以言喻嘅感動，人生嘅開始同完結其實好短暫，亦意想不到。能夠陪伴阿信走依三段人生路，經歷三次時代變遷，係難得又有趣嘅觀影體驗。

我地成日會諗，如果返到過去重頭嚟過，今日會唔會過得好啲。依部劇話咗比你聽無絕對答案，每個選擇各有取捨，有得必有失，好多事亦係注定發生，或者無常就係我地嘅日常。人生無得返轉頭， 每日向死而生，唯一可以做嘅就係珍惜每條路帶比你嘅經歷，不留遺憾。

劇集敍事方式非常獨特，無多餘枝節，剪接清楚，就算三條線輪流穿插，觀眾仍然好易跟到。而配樂由開場、過場、到及後每段情節，一時輕鬆一時沉鬱，都同劇中氛圍完美配合，將帶出嘅情緒昇華。我係第一次對港劇嘅配樂有如此深刻印象。

拍攝仲充滿銀河味道。特別係黑社會線，對白唔多，簡簡單單已經盡顯男人嘅浪漫。漫畫家線用漫畫嚟講出阿信嘅故事同想法更係神來之筆。

演員們各司其職，一同成就依部神作。蘇家樂第一次做咁重戲份嘅角色，可以話眼前一亮，扣人心弦地演出三條線嘅成長與改變；肥腸更加做出演藝生涯嘅代表作；娜姐最後嘅演繹亦令人動容。就算一眾場口唔多嘅配角，同樣演得出色，令劇集更完美。

能夠喺電視一口氣睇到十二集大師級作品，作為觀眾實在太幸福。感謝三位導演、杜sir同一班台前幕後為港劇定下新高度！

▼Follow hkpopculturelover
Instagram: https://www.instagram.com/hkpopculturelover/