陳卓賢2024保持強勢　炮製扣人心弦五部曲

陳卓賢2024保持過往幾年嘅強勢，炮製咗一部扣人心弦嘅五部曲，講出動人故事。

「並未得到你示意 現在只等你示意 並未猜得到結尾仍是故事」《Lost at first sight》
一段愛情嘅誕生其實只需一個眼神，雙眼對望，心靈接通，一見鐘情。緣份促使彼此相遇，簡簡單單足以使人心如鹿撞，未開始已經幻想日後嘅甜蜜，世界彷彿只剩下兩人，盼望對方有同樣心意，一同迷失喺依場愛情遊戲。

「我會記低 這些 那些 全部心事 郵差多謝你知 我心所向 位置」《Thank You Postman》
只要兩個人嘅心相連，即使路途遙遠，甚至要用最傳統嘅方式，都想花盡心思，以一字一句將愛意傳遞，讓感情保鮮。文字嘅溫度亦係難以取代，事隔多久再細味依舊窩心，喺現代社會更顯珍貴。

「再痛 都得拆卸 為了要盡快交場地 下套戲我要懂收放自如 題目別寫你」《以孤獨命名》
可惜嘅係，一段愛曾經多甜蜜也好，往往會因各種原因而步向終結。起初大家依然裝作愛情如初，但心中早已知道關係無法挽救。彼此只不過在演一齣注定悲劇收場之劇目，多痛都要演下去，讓感情隨時間消逝，踏上孤獨人生。

「甚麼 甚麼 甚麼全部都不是 別要說那兩個字 別講分手 我沒有和議」《鑿》
分離過後，個份鑽進內心嘅痛會令人失去理智，用多瘋狂嘅方法，都想一下子鑿走所有美好片段。然而，要真正忘記深愛過嘅人又談何容易，內心要經歷無數次掙扎崩潰，不斷憶起對方，只能在痛苦中一步步捱過，虐心至極。

「多麼天真 相信依靠幻覺的愛未朽 無人可保證這段劇情 延續萬年尚有」《玩偶奇遇記》
隨年月過去，慢慢明白到依段關係其實千瘡百孔。即使曾經努力付出，甚至改變自己，天真地覺得會得到回報，但一切只係空想，喺對方眼中自己同玩偶無異，得不到一絲欣賞。縱然如此，心中仍然祝福愛人幸福快樂，默默送上最後一份愛。

作為聽眾，依五首作品好似帶我經歷咗一段愛情嘅起跌，充份感受到故事主角個份心酸，實在太催淚。

「不懂也開始錯摸 躲不過 躲不過 吃腐肉的鷹一早喊肚餓」

五部曲以外，小組作《吃腐肉的鷹》風格特別，以力量表達對社會嘅控訴，係一首被低估嘅佳作；《久別重逢》同伊健唱出重新遇見自己之百感交集，為故事情感昇華。而Ian首次擔正拍電影，就成功帶嚟一部溫暖動人嘅作品，希望嚟緊有多啲機會喺銀幕見到佢。

「深深處還有我 在無覓處生火 滲出一線光不問結果 如像最初」

除咗一眾優秀作品，陳卓賢去年重頭戲一定係期待已久嘅個人演唱會。全晚毫無冷場，演繹充滿舞台魅力，更加入不同情感與故事，令觀眾流出各種眼淚，喺台下嘅我睇得開心投入又感動。

「近和遠 未忘記 是和你的事 眉目互動都彷似詩」

2024對陳卓賢嚟講絕對係豐富嘅一年。能夠每年都做出一系列高質素嘅歌，仲不斷尋求突破，充分顯示出佢嘅才華同熱誠，亦係樂迷福氣，佢已經係一位出色嘅唱作歌手！

「你會聽到 這是我」

最後，早排Ian 喺叱咤得獎引起咗一啲批評，我明白結果的確有爭議，但同時都唔可以埋沒佢去年嘅努力同成就。希望今次事件能夠化為Ian繼續進步嘅動力，只要再做多啲佳作，自然可以證明自己，樂迷亦定會支持到底💙

「就算比較冷清 千種反應 想把我定型 猶幸心聲得你和應」

▼Follow hkpopculturelover
Instagram: https://www.instagram.com/hkpopculturelover/