羅子溢被封「床戲專業戶」　夥何依婷連番激吻纏綿

TVB台慶劇《金式森林》昨晚（11月6日）播出的一集，焦點落在羅子溢與何依婷床戲。雖然劇情講述子溢與依婷的親熱及床上戲在劇中只是想像畫面，但連番熱吻纏綿畫面非常激烈。

何依婷向傳媒透露，由於事前與子溢做足溝通，拍攝過程快速又順利，並笑封子溢是「床戲專業戶」：「子溢係一個好好嘅前輩，佢係『床戲專業戶』，所以喺拍攝前佢會同我溝通好晒佢陣間會做啲乜、盡量搵一個令我覺得舒服嘅位去做。」

依婷指子溢對這場戲有他自己的理解和演繹方式：「我聽完都完全跟咗佢個意見去做，所以成個過程拍得好快。其實只要跟住個Flow去，就冇覺得唔舒服、或者好難去完成或者好尷尬。所以真係好多謝佢，呢個係我第一次拍床戲，之前真係完全唔識，今次同佢合作完都令我冇咁驚呢件事。」何依婷特別感恩老公很支持：「我收到劇本時，已第一時間同佢講呢件事，佢都支持我嘅工作嘅，同埋出咗街我哋有一齊睇，佢完全OK冇問題。」

另外，何依婷在劇中與私生女Jasmine（小演員沈芊羽飾 乳名竹竹）有不少對手戲，原來與竹竹合作拍攝時，依婷還未得悉自己懷孕。對此依婷笑言現在回想起，覺得整件事都是奇妙的緣份：「好似係天賜嘅禮物咁，戲入面有個女，點知現實中上天都賜咗個女畀我。」何依婷表示與竹竹的合作，令她回想起當年做兒童節目主持的點滴：「啱啱入行時，我做咗大概一年幾到兩年嘅兒童節目，當時成日都要同小朋友相處，所以識得點同劇中嘅囡囡相處，每次大家見面都好開心。」