林敏驄瘋狂爆肚難招架　陳穎欣領悟心得接得住

由林敏驄、柯煒林及陳穎欣等主演的電影《觸電》，講述由林敏驄飾演的網吧老闆，因面對經營困難，正考慮要將有10多年歷史的網吧關閉，剛巧發現一獎金豐厚的電競賽事即將舉行，因此萌生組隊參賽念頭，若贏得比賽便有資金繼續營運網吧，最終在拉雜成軍下勉強參賽，眾人在過程中體會到親情、友情的羈絆，讓心懷夢想的他們不再抱憾。

林敏驄與飾演其女兒的陳穎欣分享拍攝感受，談到電影涉及電競，向來冇厘正經的林敏驄搞笑指自己出身電競冠軍世家：「我含住隻Mouse出世。」他指劇組特意請來真正電競界高手，教導他們正確手勢：「學咗成分鐘，啲高手話好似，仲勁過佢哋，我哋靠演技搵食㗎嘛！」陳穎欣笑指跟林敏驄合作感覺新鮮，她説：「要腦筋好靈活，要接到佢嘅嘢。（接得住？）我搵到個方法，因為如果你掛住劇本裏面嘅事，會好容易因為新嘅嘢被打亂。（林敏驄冇厘正經？）我本身都幾鍾意呢種唔沉悶嘅方式，反而跟住佢去會更容易做到。」談到訪問期間雖然不時受林敏驄搭嘴岔開話題，但她卻完全不受影響「佢有佢講，你有你講」，林敏驄即爆圈中幾位藝人如何對付他這種隨時爆肚的人：「周柏豪就搣自己大髀忍笑、鄭伊健就講啲無厘頭嘢，咁就化咗。」陳穎欣也笑指戲中幾位拍檔對此也很有心得：「所以我覺得阿Will（柯煒林）喺呢方面好叻，會好老正咁企喺自己角度，同埋波姐（馮素波）都好有經驗！」林敏驄即搭嘴：「波姐好嘢，四兩撥千斤卸咗你！但佢噏嘅嘢又唔係全部無厘頭，有少少好似同劇情有關。」

陳穎欣表示雖然對方不時爆肚，但導演從不NG，會讓演員們繼續發揮，自己也從中學到不少，包括利用肢體動作令演出更豐富：「劇本本身定咗，但驄哥好聰明，唔會就咁放過，想畀好多Input，我覺得作為演員都要有呢個心態，去畀多啲嘢個劇本。」問到林敏驄跟新一代演員合作會否出現代溝？他説：「冇，我哋打成一片，佢哋好有活力。」電影中還有蘇皓兒、盧慧敏、ANSONBEAN及羅浩銘等演虛擬角色，林敏驄坦言因與他們是分開拍未有同場，原先以為電影主要講年輕人打機，但後來發現也涉及不同年齡層，老、中、青一起去完成一件事，讓不同觀眾看後都會有所感受和得着，是一部很勵志的電影。

談到柯煒林早前於社交網公開自己不幸患上第4期肺腺癌，現時已全面停工接受治療，陳穎欣表示大家知道消息後都很擔心，自己有私訊對方慰問，她說：「佢好似平時嘅佢一樣，好堅強、好陽光，佢反而會調返轉叫大家唔使擔心，我都相信佢好快會好番，希望佢早日康復。」林敏驄亦讚柯煒林與戲中角色性格很相似：「我覺得佢好正面，但人生會有啲上上落落，大家都會遇到唔同程度嘅困難，大家都要面對克服。」另談到現時香港電影市道低迷，很少新戲上畫，林敏驄坦言能開拍已算幸運，因經濟環境不明朗，令不少投資者也要再三考慮，甚至卻步，自己籌備了幾個計劃亦因此要延遲，當中包括電影及其他項目，不過樂觀的他笑指自己瓣數多，電影延遲可以先搞個演唱會。

場地：合和酒店 HOPEWELL HOTEL

東網網站 : https://on.cc/東網Facebook專頁 : https://www.facebook.com/onccnews/