女神配對計劃｜曾展望為葉蒨文破例追愛 林俊其告白感動網民

無綫戀愛綜藝真人騷《女神配對計劃》下周一（8日）起一星期播出6集結局篇《女神配對計劃 最後告白》。《最後告白》預告中，12位求愛勇者向心儀女神送上「十年後的深情告白」，幾乎所有女神都感動落淚，引起網民熱烈討論。昨日（4日）製作組播出羅毓儀（Yuki）組的兩位勇者林俊其（Kris）和Cyrus的告白片段，其中Kris的「家的承諾」感動網民留言洗版。

Kris表示：「10年後，我會笑得多咗，我會變成陽光男孩，因為你10年前同我講過話鍾意我笑，我都好鍾意睇到你笑。同埋10年後，我諗你應該飲咗幾千萬壼咖啡，因為你曾經同我講話想飲咖啡，依家已經變成咗每日一杯，同埋每日一個早餐，因為你講過你唔係好識煮嘢食，等我煮畀你食，同埋之後可能我哋會研究好多唔同嘅新菜式，因為你同我講過好想試我唔同嘅菜式，叫我煮多啲，咁你就應該做咗我10年嘅白老鼠喇。我哋10年後應該會成為視帝視后，因為我哋呢10年不斷一齊研究，成為咗對方嘅演戲導師，你嘅作品，我會每晚同你一齊去諗唔同嘅橋。最後我想同你講，10年後，我哋可能會有一個屬於我哋嘅家，因為你同我講過你想有一個屬於你嘅地方，呢個地方係畀你遮風擋雨，同畀你知道原來仲有好多地方係可以保護到你。」

Kris憑真摯告白贏盡網民支持，他昨晚獲曾展望（GM）邀請，聯同節目監製開Live，大爆《女神配對計劃》幕後趣事。Yuki在Dating Camp期間因醉酒不適，Kris暖心照顧，全程手持大型垃圾桶追着Yuki。Kris笑言：「佢話要去廁所，我哋就跟住，點知佢話唔舒服想嘔，我即刻搵附近有咩，見到個大垃圾桶就一路拎住一路跟住佢。」官方今日釋出被刪片段，畫面中Kris全程專注守候，一見Yuki有異動即推桶上前，十分細心。

GM坦言從未如此主動追求女生，證明葉蒨文（Sophie）是他心中唯一。他說：「我好少為追女仔而追，通常都係自然一齊，好少做咁多。」他亦自爆拍攝三角枱飯局當晚，遊戲開始前已緊張到在場外踱步30、40個圈，苦思如何開口。他說：「我唔係完全唔識佢，但講咩好啲呢？」不少網民好奇他與Kris參加節目的原因，GM直率回應：「得一個原因，就係為咗個女神。」原來拍完三角枱飯局後，Sophie察覺GM太緊張，特意向製作組求情，希望減少播出相關鏡頭，只為保護作為同事的GM。GM得知後一臉冧樣。GM與Kris在直播中透露希望拍攝《女神》旅遊番外篇，又強調《女神配對計劃》製作極為認真，拍攝Camping時現場設置超過40部攝影機，全方位捕捉每個細節。

（即時娛樂）