防止性上癮新法寶「The Coach」研發手機貞操帶

睇咩片都好，睇得多都可能會過於沉迷，甚至會有上癮嘅問題。有研究指出57%嘅年輕人每月會頻繁咁主動搵色情內容，性上癮更加有年輕化嘅趨勢。喺呢個時候等我向大家介紹一個法寶，不可以色色之手機貞操帶！

以男士健康為主題嘅App「The Coach」就係睇準咗男人夠咸濕，有商機，所以就研發咗「手機貞操帶」，佢嘅本質係一個手機鎖，由金屬同皮革製成，你可以根據你手機嘅型號去調整皮革，仲有橫向同縱向揀，而鎖匙就可以交俾你信任嘅人。除咗手機版之外，「The Coach」依家仲研發緊手提電腦版同桌上電腦版，到時大家就會有更多款選擇。

暫時只係公佈咗設計圖，「The Coach」預計貞操帶會定價喺100美金左右。睇完個設計，基本上佢係直頭封咗成部機唔俾你用，可唔可以防止性上癮就唔係好肯定，我淨係知唔可以俾啲家長發現呢個法寶，如果唔係相信咁多位學生哥以後都唔洗諗住可以上網啦！