黃明德Dark以學生視角唱作，出道一年交出成績連奪新人獎

「留班同學」黃明德 (Dark) 學業成績可能麻麻，不過由班房走入樂壇僅一年，暫已連掃兩個新人獎，難怪他在叱咤樂壇流行榜頒獎禮的台上致謝時，也不禁說「今次應該係我考得最好嘅一次。」

Dark 是應屆中學文憑試考生，2022 年正式出道，日間是個學生，忙著補習、預備考試，下課後仍然身穿校服就趕往宣傳、做訪問。出道第一首歌，不少歌手都選擇青春、愛情等題材，Dark 卻自揭黑歷史，「嗰陣時同啲 friend 講我準備出歌，出道做歌手，第一首歌叫《留班同學》，佢哋係嘲笑我，覺得點解係講留班？」

中一、中二各留班一年，雖然耽誤了兩年時間，卻意外成為了大家的記憶點，「首歌出到嚟反應唔錯，原來好多人都留過班，引起到好多共鳴。」Dark 說，即使大家未必留過班，三年來都被疫情耽誤了不少時間，所以想透過歌曲勉勵大家，「好似我留班兩年咁，原地踏步咗兩年，其實唔需要驚嘅，我哋前路希望更加光芒，繼續努力行之後嘅路就得。」

「你升了級 但我始終停頓於低位作戰」- 《只想和你吃漢堡》

這一代長大的，學樂器已成為基本，Dark 算是遲起步，13 歲才跟哥哥自學結他。有一次學校開放日，他向老師自動請纓爭取演出機會，自言不是「模範學生」的 Dark，眼見台下觀眾的反應，終於找到想追的夢，「我讀書係好差好差，但原來唱歌，其他人反應係咁好，咁不如我索性立志做歌手，唔讀書喇……」

結果未畢業就夢想成真，獲唱片公司發掘成為歌手，還能推出自己創作的作品，不過 Dark 說學業始終放第一位，除了因為學校不容許再留第三次班，亦因為想減輕家人壓力，因為他哥哥曾跟他說，每延遲一年畢業，媽媽便要工作多一年。要兼顧學業，唯有犧牲心愛的砌模型、打機時間。

「年華正茂應有歲月這樣過 從來不錯」- 《沒有穿校服的日子》

每個年代的學生都擁有屬於自己年代的校園歌，Dark 第二首派台歌《沒有穿校服的日子》，講被奪走的校園生活，沒有實體課、丟空的課室，正是這兩、三年學生們的寫照，十年八年後，相信會成為這一代人的集體回憶。

Dark 現階段選擇用歌曲唱出學生視角，「究竟作為一個學生我點睇呢個世界？或者我哋經歷過啲乜嘢呀，咁去唱俾我哋嘅樂迷聽。」

「明明無答案於心 問題都要問」-《Don't think too much?》

最新的派台歌《Don't think too much?》，靈感來自 Dark 一個小習慣 — 睡覺前愛胡思亂想。他說自己跟另一個不擅於表達的自己對話，過程中了解自己更多。「例如嗰日選擇咗飲咖啡，無選擇到飲奶茶，另一個自己就係如果選擇咗飲奶茶嗰個自己，同係我收埋喺深處嘅一個自己去傾偈，會了解到自己多一啲。」

這一、兩年樂壇新人湧現，Dark 於剛過去兩個樂壇頒獎禮中都獲新人獎，收到一張不錯的成績表，但原來 Dark 對自己缺乏自信。「我不嬲對自己信心唔係話太大，未搵到啲令自己好 proud of (自豪) 嘅一樣嘢，如果我攞到獎或者有啲咩成績，可能可以將佢轉成信心畀到自己…」他補充，與樂迷分享自己音樂，有人認識自己，比獲獎更重要。

「期待我的今天過十年 會變成勵志片」- 《留班同學》

新一年不再有「新人光環」，Dark 首要目標是應付好文憑試，希望能成功考入大學修讀歷史系。事業上，Dark 就希望向唱作歌手之路進發，有能力包辦曲、詞、編、監，「我想成為一個任何人都鍾意聽我嘅歌嘅人，target audience (目標聽眾) 唔係淨係學生，唔係淨係某一個年齡層嘅人，而希望任何人都會聽我嘅歌，會得到一啲得著或者共鳴。」

近年各電視台都舉辦選秀節目，亦成就了一群學生歌手，「中學生應否談戀愛？」這些作文或辯論題目或許已經過時了，現在應該要問「中學生應否追夢——特別係明星夢？」