連詩雅久違新作《人生使用說明》　道出成長之苦與樂

連詩雅久違嘅新作《人生使用說明》，以熟悉嘅演繹為大家道出成長之苦與樂。

「舊照片裡得幾歲 擺滿公仔 直覺地抱緊當刻最珍惜東西」

人生在世，由小時候純真地玩樂，慢慢被課業同工作壓力充斥，到成家立室後更加係負上重擔，每個階段都會面對不同嘅挑戰與痛苦。可能因為怕落後於人，亦可能因為怕失去方向，我地總會按照俗世所謂嘅標準前行，可惜並唔保證成功，反而會錯過沿路美麗嘅風景。

「成長這段旅程 飽經兜轉磨煉耐性 人生按着說明 都不可對成敗保證」

回望過去，成長旅程中必定有各種遺憾。我地無法逆轉時間，錯過咗就係錯過咗，但最少過程能令你更清楚自己所求，當中嘅得與失，樂與悲都塑造咗今日嘅你。人生的確充滿取捨，但正正因為咁先顯得每段經歷珍貴。

「為何有顧慮 時光太短抱憾很長 每年又添一歲 願你珍惜所愛 趁未有失去」

當感到氣餒時，緊記你已經走過一個個難關。珍惜每段回憶，珍惜仍在身旁嘅每個人，珍惜每份愛。人生並無標準嘅說明書，但時間卻有限，無需太執著於過去，跟隨內心，活得快樂自在，無悔地寫下屬於你嘅故事就好。

「如無數事情 人真正需要什麼 要細緻來靜聽 真正在意 其實早看清」

轉眼間我已經聽咗Shiga超過十年，由當年《只要和你在一起》、《到此為止》等悲情歌，到今日《人生使用說明》講成長。Shiga變得更成熟，近年佢作品少咗，但演繹仍舊動人，係滿滿嘅回憶味道，如果之後有機會出返首苦情歌就正了！

「來忘記眼淚 時光太短故事很長 每年又添一歲 共你可將所愛 抱在兩手裡」

最後，假如你依刻感到迷失，不妨放慢步伐，聽下依首作品，或者會對人生有點新看法🤙

《人生使用說明》連詩雅
曲：徐浩、易子竣
詞：張楚翹
編：徐浩、易子竣
監：周錫漢

「成長這段旅程 不經不覺沿着路徑
無需再覓證明 簡單的愛才是本領
如無數事情 人真正需要什麼 要細緻來靜聽
真正在意 其實早看清

回憶裡住了誰 幾多可以陪伴下去
曾經告別過誰 不必將那遺憾再追
來忘記眼淚 時光太短故事很長 每年又添一歲
共你可將所愛 抱在兩手裡」

▼Follow hkpopculturelover
Instagram: https://www.instagram.com/hkpopculturelover/