娛圈單打︱兩個都係大翻身　互相成就狂掘金

K-Pop頂流女團BLACK PINK舉行嘅世巡《DEADLINE》成為全球盛事，早前唱到去美國洛杉磯。「火星人」Bruno Mars驚喜現身，登上舞台同Rosé合唱《APT.》，掀起全場高潮。事後Bruno Mars喺社交網幽默留言，話全靠Rosé，自己幾乎清晒所有債務。嘩嘩嘩，係咪終於唔使再喺賭場賣唱嘞？

當然啦，火星人都係搞吓笑啫，呢啲係鬼佬式幽默，反正全世界都知佢爭落大量賭債，唔講邊有得笑吖。眾所周知，Bruno Mars大紅於2010年代，《Just the Way You Are》、《Uptown Funk》首首經典，傳聞每年收入高達9,000萬美元。

即係差不多7億港紙呀，打跛腳都唔使憂啦啩，點知條友仔染上爛賭惡習，搵得多賭得仲多。美媒去年踢爆，條友仔欠下5,000萬美元賭債，無力償還，只能淪為拉斯維加斯賭場嘅駐場歌手。唉，一代巨星淪落至此，都咪話唔令人唏噓。

之不過，一命二運三風水，因為Rosé係火星人超級粉絲，心心念念希望有機會合作，單飛後自由度更大，於是膽粗粗向唱片公司反映。本來諗住99%會被偶像回絕，點知Bruno Mars竟然𦧲飯應。嗚呀，夢想成真，全球大熱，莫講話火星人清晒債務，Rosé一樣係吐氣揚眉啫。

冇誇張㗎，呢首歌連3歲細路仔都琅琅上口，Rosé亦由全團最沉，一躍而成全團最火，成功打入朝思暮想嘅美國市場，既唱《F1電影》主題曲，又同另一美國歌手Alex Warren合作。至於火星人亦鹹魚翻生，重新炙手可熱。所以話啫，二人互相成就，火星人真係要斬手指戒賭嘞！

東網網站 : https://on.cc/東網Facebook專頁 : https://www.facebook.com/onccnews/