香港16歲訓練員奪Pokemon世界冠軍 成亞洲首位世一小精靈訓練員

Pokemon!日夜鍛練去取勝～尋晚，喺我哋瞓緊覺嘅同時，香港再誕生多位世一啦！香港Pokemon GO嘅代表「蝦皮」成功喺Pokemon世界賽擊敗對手，成為Pokemon GO世界冠軍！睇嚟成為真正嘅小精靈訓練員不是夢啊！

Pokemon世界賽「Pokemon World Championships」一連三日喺夏威夷舉行，嚟自香港嘅16歲選手鄭業楷，人稱「蝦皮」，以全勝嘅成績殺入總決賽，對決荷蘭代表Inadequance，最終以局數3：1，出動大舌頭擊敗騎拉帝納，成為世界冠軍，獲得二萬美金獎勵，仲係首位喺呢項比賽取得冠軍嘅亞洲人。年僅16歲嘅蝦皮，其實早喺2022年嘅GBLA網上戰贏得世界冠軍，上年亦有參加嘅Pokemon世界賽，但好可惜遺憾出局。今次，「蝦皮」再接再勵，終於順利成為世一，見到全場觀眾都為「蝦皮」企哂起身鼓掌、歡呼，就知「蝦皮」嘅表現係幾咁出色！

要成為世一嘅小精靈訓練員真係唔係咁簡單㗎，除咗真係要日夜鍛練之外，仲要頭痕旅費嘅問題，上年一眾去參加Pokemon世界賽嘅香港代表就好好彩得到Pokemon愛好者嘅支持先可以籌到錢去參加比賽，所以「蝦皮」今次嘅勝利一定令支持佢哋嘅人覺得好值得啊！喺呢到再次恭喜「蝦皮」成為世界冠軍！有咗「蝦皮」呢個榜樣，相信未來一定有唔少人都希望可以跟隨佢嘅腳步，成為一個專業嘅小精靈訓練員啊！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/