娛圈單打︱星二代被嘲啃老　玩唔起又要溝女

姜大衛同李琳琳個寶貝仔「細John」姜卓文，因為參加《女神配對計劃》而知名度大開。節目中，佢同冧爆佢嘅關嘉敏（Carman）這麼近、那麼遠，硬係戀人未滿咁款，搞到Carman忍唔住淚眼汪汪。唉，見到女神咁委屈，個男人梗係被鬧爆啦！

喺「最後告白」中，細John坦言同Carman嘅緣分、Timing好似未啱咁，仲首度披露自己有焦慮症，近日因為工作量急升而令壓力爆煲，一度萌生退出《女神》嘅念頭！吓，咁突然？

結果此言一出，網上一片罵聲！網民批評細John無心同Carman發展，甚至連拍拖都未Ready，根本唔應該參加配對節目，形容細John「好渣」、玩弄感情、攞焦慮症做藉口逃愛！部分網民愈數愈起勁，直斥細John好聽叫做星二代，難聽就係啃老族喎！

哇哈哈，睇嚟網民好認真！喂，本欄一早提醒，睇呢類戀綜真人騷，可以投入，切忌認真！網民睇到咬牙切齒，紛紛戥Carman唔抵，證明呢個戀綜能夠帶動觀眾情緒，非常成功！但係講到細John「好渣」、「啃老」，近乎人身攻擊，實屬不必。

即係咁，雖然係真人騷，但若然話冇劇本，三歲細路都唔信！可能細節任由女神們與參加者自由發揮，但大框架都係要跟住劇本走，都係戲一場啫。勉強冇幸福，細John同Carman唔過電都冇計，唔係網民想將佢哋配對，人哋就要將就一齊。嗱，連Carman都直認唔夠細John緋聞女友、巨乳網紅CoCo揮，網民又何必咁認真去批判男方？呢次配對唔成功，咪等下次囉。

東網網站 : https://on.cc/東網Facebook專頁 : https://www.facebook.com/onccnews/