利華古遜中場域斯考慮今夏轉會

根據德國踢球者消息，利華古遜同中場域斯係上年12月曾經就續約達成原則性協議，由嗰陣開始利華古遜就一直等待域斯作出最後確認，但係去到今日似乎出現改變。域斯同佢嘅團隊原本計劃等到出年世界盃之後先至轉會加盟頂級球隊，但域斯依家考慮今個夏天轉會可能性😶

消息指拜仁已經公開表示好想簽入域斯，拜仁榮譽主席漢尼斯曾經講過拜仁願意透過銀行貸款去完成呢單轉會，而球隊選擇唔同湯馬士梅拿續約就係想籌集資金完成域斯轉會。除咗拜仁，曼城都對域斯好有興趣，並且計劃比域斯取代即將離隊嘅奇雲迪布尼。利華古遜依家仲未為域斯續約設置最後限期，佢哋只可以等待球員作出最後決定🙃

域斯係三月頭對住雲達不萊梅德甲比賽右邊腳踝內側韌帶受傷，呢位德國🇩🇪球員已經恢復訓練，有機會係今個星期對住柏林聯德甲比賽復出而域斯最近就係社交網站就話「我好開心可以重返球場，並且為球季最後階段做好準備。」