《光明大押》貓店長蝦餃超搶戲　片酬高過演員爸爸媽媽

ViuTV原創劇集《光明大押》近日開播，由謝君豪、呂爵安（Edan）、練美娟（娟姐）主演，但最搶鏡的卻是一貓分飾兩角、化身為店貓「燒賣」與「蝦餃」的貓演員「仔仔」，以萌爆可愛的外表成功「吸粉」，成為網民熱話。有觀眾笑言：「Edan要小心，蝦餃已經威脅到你嘅人氣！」

劇中講述由謝君豪飾演的堅叔年輕時在押店後巷發現流浪貓「燒賣」，後來「燒賣」失蹤。20年後，一隻樣貌幾乎一樣的貓再度現身，命名為「蝦餃」，劇情充滿懸念。不少觀眾指蝦餃自帶朝偉式憂鬱眼神，「一望就有戲」，甚至比不少演員更有觀眾緣。

貓店長的出色表現連監製兼演員謝君豪都忍唔住大讚：「仔仔好可愛，我講嘢佢真係會望住我同畀反應，個樣又得意，搶晒戲，但被佢搶戲係幾心甘情願。」

這位「新晉貓星」實際上是一隻金影英國短毛貓，今年5月17日剛滿3歲，現實中的主人Jam詹成鈞及SiuYing 均為演員。Jam曾透露，帶仔仔去試鏡時，仔仔表現極不合作，連簡單指令如「hand hand」和「Hi Five」都不肯做，反應慢熱，連他自己都無信心中選。點知試鏡幾個鐘後即收到通知成功「中Cast」，片酬更高過仔仔的貓爸貓媽！

原來仔仔早年曾被棄養，當時只有六個月大，Jam在網上見到徵主貼文，聯絡後發現對方是一對年輕情侶。他們要求收取數千元「領養費」，雖然不清楚是否屬於賣貓，Jam仍決定接手照顧仔仔。

初到新家的仔仔對人極度有戒心，經一段時間相處後才慢慢放下防備。Jam形容仔仔是「天使」，比一般貓乖，不會搞破壞、抓梳化，性格慢熱兼「有啲笨笨哋」，行動慢條斯理，幾乎成日都係瞓覺，屬於慢活型小王子。

仔仔對玩具要求亦相當獨特：毛毛棒、發聲波波唔啱口味，反而用紙條自製玩具就玩得好開心。至於飲食習慣方面，仔仔特別鍾意三文魚刺身，但對熟食無興趣。

仔仔首次演出就被大讚「靚仔」、「有戲味」，是否會繼續在娛樂圈發展呢？Jam就表示日後如果有其他演出機會都會讓仔仔嘗試。