江嘉敏爆3拒續約無綫自斷後路　親認與馮盈盈「緣分盡咗」

藝人江嘉敏近日接受電台節目訪問，她今年二月約滿無綫後離巢，承認約滿半年前先後跟高層談了三次續約，但最終決心跳出舒適圈，並自揭沒有任何後路：「第3次同珍姐、樂小姐傾，都同我講到人生，問我30歲有乜想做。令我諗番自己話細唔細，話大唔大，真係仲有好多嘢想試！譬如今次音樂劇同再拍番電影，最後係鼓起好大嘅勇氣話想出去試。」至於被問及續約有否被加薪，她猶豫了一刻說：「嗯？有無呢？正常囉！條件係正常。」到底有沒有加薪？她只尷尬笑說：「哈哈哈！講得嘅咩？」提到早前客串演出了4場由陳恩碩監製的長壽音樂劇《我們的青春日誌》，她自言是自薦、不計戲份及酬勞地演出該音樂劇：「事前我自己學咗一個月唱歌，但成件事好大得着，因為我會緊張，係搵番初入電視台嗰團火！」

回想當年，江嘉敏的母親曾以娛樂圈複雜為由，反對她入行，9年過去經歷了「介入人夫緋聞」及「富豪船P姊妹反目」兩大新聞而飽受負評，問她認不認同娛樂圈複雜時，她不諱言：「複雜呀，所以如果將來我有仔女，係唔會畀佢哋入娛樂圈。」她憶述2018年拍《兄弟》一劇爆出人夫緋聞，她曾崩潰哭著跟監製談要求退出，亦曾想過輕生，幸得拍檔劉穎鏇及張繼聰開解，後來她突然變胖，她坦承與壓力有關：「係有關，因為我習慣有壓力就狂食嘢，依家我點都唔會喇！」她稱現時學懂面對haters：「我學識咗處理情緒，以前心口掛住『勇』字，會寸嘴回覆負評。依家會識分，對邊啲負評一笑置之。」

至於經歷「船P事件」她又學到甚麼？她說：「又係唔好心口掛個『勇』字衝出嚟囉！以前我情緒行先，但大個咗先至明，先發洩咗情緒會令未解決嘅事更加差。依家我學識以後無論發生任何事，都先冷靜五分鐘，最後先解決自己情緒。」曾與馮盈盈情同姊妹，問她是否相信女演員間存在真友誼時，她表示：「到依家我都相信人與人之間有信任！但人每個階段朋友都唔同，只可以話緣分盡咗，以前會強求朋友點解唔可以永久，依家知道勉強係冇幸福。」

談到感情，江嘉敏坦承年輕時戀愛腦，試過忍受前度多次出軌：「初戀係唔識處理，一拍拖就諗結婚，會為對方諗，佢只係做錯1次啫！到第二次，就諗佢冇3次嘅；到第3次，又諗佢唔會有第4次嘅；直到反問自己：佢當我係乜？決絕分開後都未醒得晒，會幻想如果7日內佢氹返我，我會同佢響番埋一齊。但依家諗返當年，都想冚自己兩巴！」至於談及上一段感情分開的原因，有傳因為前度有第三者，她說：「你問番當時人啦！因為都過咗去，最初嗰個月好執著，好想知點解。但依家都過咗幾年，依家知道真實原因，又或者你要講大話呃我，已經唔再關我事。」至於當時也有傳前度不滿她剪短髮拍劇而導致分手，問她要是再遇上這樣的另一半，她斬釘截鐵說：「Bye Bye啦！語氣好似好八婆，但我唔後悔咁講，哈！係即刻分手，Bye Bye。」

東網網站 : https://on.cc/東網Facebook專頁 : https://www.facebook.com/onccnews/