麻雀樂團｜關嘉敏憶初戀被小三挑機 掀慘痛經歷演活「機心女」

憑《女神配對計劃》人氣急升的關嘉敏（Carman），在前晚（6日）《麻雀樂團》一集登場，她的角色機心感滿滿，還不時挑機。事緣程晴（胡敏芝飾）與前度阿輝（鄔嘉駿飾）分手後，對方與阿玲（關嘉敏飾）拍拖。某日，3人在程晴漢堡包店相遇，性格驚青的程晴顯得手足無措，阿玲見狀竟食住上、出盡全力「夭膶」程晴兼𢯎著數，挑機港女格相當乞人憎，並向阿輝說：「搞錯自己Ex都唔認得」、「（潤程晴）我都話啦最緊要屋企有錢」、「我哋過嚟有冇折㗎，話晒佢係你個Ex」、「唔係呀嘛，你同阿輝散咗咁耐，都仲未有拖拍呀？」由於Carman演得入型入格不少網民看得咬牙切齒，直呼關嘉敏「賤人」！

Carman以往亦有不少「渣女」角色，尤以《美麗戰場》中的「進擊的小三」圓圓，最令人留下深刻印象，但現實中的Carman性格率真、體貼及傻氣，獲網民封為「真女神」。談到是次角色，Carman受訪時坦言與自己真實性格相反，相對以往演繹的「八婆」角色難度再升呢。

她說：「呢個角色內斂啲，要將八婆性格收埋少少，但同時又要表達到佢好想窒胡敏芝，好難拿捏。」為了投入角色，Carman勾起初戀遇到「挑機小三」的經歷：「我心入面係諗住我嘅初戀去做，因為我初戀嘅第三者，就係表裏不一嘅人，我好彩有呢個經歷，我真係諗住嗰個人去做！」

Carman續指：「嗰時個男仔（指前度）聖誕節呃我出去踢波，其實就同呢個第三者出去食聖誕大餐。原本我諗住等佢踢完波，去睇場戲或者出街，但最後尾冇出到。原來我初戀男友送咗份聖誕禮物畀第三者，個第三者返到屋企影完相仲喺facebook tag我，跟住又即刻delete張相。呢個女仔成日滲啲滲啲話畀我知佢嘅存在！如果佢唔係咁樣做，我都唔知…中間發生咗咁多嘢…係囉，所以好深刻。」

監製羅永賢（Marco）大讚Carman「生得夠高大」兼符合角色，單靠畫面已呈現出她氣勢全面壓倒胡敏芝。Marco讚Carman專業：「佢（Carman）就算冇對白嘅角色，都會好認真做，好似之前《破毒強人》，佢雖然只係飾演冇對白嘅殺手，但佢為咗演好個角色都有參與動作訓練，係好有鬥心嘅好演員。」

《麻雀樂團》近日其中一個場口引發熱話。劇情講到沈家明（郭柏妍飾）意外被整爛大提琴、並為高昂的維修費煩惱，程朗（黃庭鋒飾）見狀即主動出錢幫家明解困。家明為回饋阿朗好意，主動向對方呈上借據，並以可愛跳脫Tone朗讀相關內容：「甲方沈家明向乙方程朗，借款四萬港元維修大提琴，並承諾於一年後連同五厘利息歸還給乙方，期間，乙方可以差遣甲方做任何事，只要對方力所能及，必定盡心完成，立此為據。」

庭鋒亦在社交平台曬出與拿借據的郭柏妍合照，並留言：「債主程朗借了四萬港元畀債仔家明，有相為證！」

該幕引發《溏心風暴》集體回憶，《溏》其中一個經典場口，是常在心（鍾嘉欣飾）為感激得得地（陳豪飾）無條件借錢幫忙，立下借據：「甲方感激乙方， 乙方將來如有任何困難，甲方必定赴湯蹈火， 無條件幫忙， 此承諾為一生一世， 直至任何一方死亡為止。」

（即時娛樂）