羅家英買樓買基金保障阿姐未來 一生功力無人承繼留遺憾

羅家英近日接受查小欣YouTube頻道訪問，壓軸「感情篇」下集今天（8日）上架。家英哥在節目中透露對身後事已有全盤計劃及安排，特別買下一層樓、兩份保險留給太太汪明荃（阿姐），甚至購置兩幅相連土地，將來與阿姐也百年歸老後合葬。

家英哥表示阿姐婚後變成愛做家事的賢內助︰「佢好鍾意做屋企嘢，鍾意抹枱、執嘢、搬花盆，將啲櫈搬上搬落。佢咪叫工人做，但唔好旨意叫我做。No，我喺屋企係休息嘅，你唔好理我攤喺邊度，小小地方我就瞓得㗎啦，所以依家我有間屋做後備，喺廣播道，隨時嗌交就去住啦！」談及與阿姐因何事吵架，他猶有餘怒：「我真係嬲！揸車千祈唔好畀個女人坐你隔籬，叫你行呢度、行嗰度，唔准轉彎、唔准咩，幾煩，最好（阿姐）瞇埋對眼，遮住瞓覺！」

雖然如此，家英哥十分疼惜阿姐。四度患癌的他直言近日已做了很多保障阿姐的未來︰「我最近做咗好多嘢，買咗兩份投資保險同基金保險，寫咗佢個名，仲有我哋排戲嘅地方，樓上12樓，我都買咗，我話『有乜嘢事，呢層樓係你嘅』。我話咗俾佢聽，佢嘅反應係點呢？冇嘢，全無表示！」家英哥自言思想傳統，來日百年歸老，他傾向土葬：「我已經買咗塊地，買埋阿姐，買咗兩幅，買咗成10幾年啦，呢啲好簡單，睇你有冇錢去買！」

家英哥與阿姐不忌諱生死話題，平日亦會討論一下。家英哥說：「我估計都係我走先過佢，佢身體唔錯，但我想遲過佢走，我可以照顧佢，等佢放心。我唔會要佢啲錢，講明㗎啦！ 兩公婆絕對要講錢，唔好唔講，講清楚大家冇芥蒂！佢需要我講清楚，女人對錢好重要，啲錢係佢自己辛辛苦苦掙番嚟，佢唔會亂咁用，亦唔會將錢用喺我身上，最多買件衫我著吓，大家食飯都要AA制。」

談到兩人位於西貢的豪宅屬阿姐名下，家英哥被問到可要交租時說︰「差唔多，交半個牀位租。工人要唔要分清楚？唔使。我同佢講，我同你結婚，你嫁夫隨夫，你不如按照我生活去做，我照顧你，啱唔啱？我包晒！不過，依家唔係，係我入贅畀你喎，我去你屋企住，你要你咁嘅生活，要咁嘅包裝，我冇能力，亦都話唔想，所以你唔好旨意我負責呢樣嘢！我負責啲咩？畀啲家用囉，梗係有五位數，掂唔到六位。佢又OK呀，每個月過數畀佢嘅助手！」

面對未來，家英哥希望能隨心所欲、自由自在過日子。他表示︰「好似雀鳥喺天空，呢度飛吓、嗰度飛吓，呢度好食就食、嗰度好住就住，呢個係一個妙想嚟嘅啫，我鍾意啲清靜無瑕嘅地方，睇吓山、睇吓水，去參透吓生死命題！會唔會想呢個時候彌補遺憾？唔要求，唔好諗咁多嘢，我冇遺憾，我樣樣嘢都想做，樣樣嘢都做唔到，不如唔好做，做到就做，做唔到就算數，唔好迫自己。」

家英哥坦言沒有下一代，對他來說是一個小小的遺憾。他說︰「不過，有好有唔好，因為冇仔女，你就冇後顧之憂，最多就係我嘅一生功力 - 做大戲冇後人承繼。雖然有徒弟，但唔係有血緣！」

（即時娛樂）