郭思愛上足球運動　計劃暑假帶團韓國睇波

英皇藝人郭思（Suey）與蘇皓兒等早前參與綜藝節目《足球女將》，並組成女子足球隊，踢波踢上癮。「2025年東亞足球錦標賽」七月於南韓舉行，香港隊將硬撼南韓隊，作為球迷的Suey計劃暑假帶團去韓國睇波，提到今次舉辦旅行的契機，Suey表示：「之前香港對印度『亞洲杯外圍賽』嗰場賽事，坐爆咗啟德場館，真係好震撼！咁多香港人為香港隊打氣，嗰種感覺好難忘。我都想試下去作客打氣係咩感覺！」她又自爆原來今次成團，是「偷橋」偷返來，「公司有個『蛋記星級旅行團』，我就諗不如將去韓國睇波呢個idea聯繫落去，點知真係搞得成！」她更找來本地足球平台合作，今次行程重點當然是入場撐港隊，Suey話會跟大隊一齊打氣：「第一次作客睇波，都係入鄉隨俗啦。」除了睇波，她都坦承有私心，乘機瘋狂購物：「如果行程有時間嘅就會去放鬆吓，因為好耐都冇好好地咁樣去一個旅行。同埋因為上一次去韓國旅行，唔記得咗去行街，淨係掛住食嘢！哈哈！所以今次希望多啲時間去行吓街、買吓嘢。」

東網網站 : https://on.cc/東網Facebook專頁 : https://www.facebook.com/onccnews/