女神配對計劃︱葉蒨文咬唇放電冧曾展望：你想食我口水尾？

無綫戀愛綜藝真人騷《女神配對計劃》，藝人曾展望（GM）在第一集勇敢站出來向葉蒨文（Sophie）真誠表白「我唔想你畀人追走」開始，2人甜蜜互動成為全城期待焦點，周日（22日）播出的第三集，將直擊Sophie與林澤謙（Him）、林堡熙（Eddie）及GM的「三角枱約會」，雖然GM具備了Sophie最喜歡的幽默特質，但兩位對手阿Him及Eddie同為港隊代表，亦具備了Sophie鍾情特質，阿Him獲女神開口讚勝在夠純粹，Eddie則因擅長睇網絡地圖正中Sophie周圍去貪玩的喜好，Sophie更評價其中一位為「男版葉蒨文」。

戰鬥力強的GM，雖然初時未能爭取機會與Sophie「對話」，但就經常有意無意間瘋狂插嘴，又指出Sophie愛吃芫茜宣示主權：「Sophie最鍾意食芫茜㗎喎！」豈料不但遭到Sophie質疑，還換來女方一盤冷水：「其實我係咪淨係可以同佢（該回合勝出者）講嘢㗎咋？」進擊的GM即時補鑊：「其實我都想問嘅，你介唔介意我哋搭嘴㗎？不過如果我贏咗，我都會畀你一齊傾嘅。」未知是否太心急搶攻，GM嘴角沾了醬汁也不自知，樣子趣怪又可愛。

整集重頭戲，自然落在GM與Sophie面對面撐枱腳環節，GM開口便口花花叫「蘇菲姐姐」，但又帶點怕醜說：「第一次同你兩個人食飯！」Sophie先問GM要不要品嘗她點的菜，眼睛放電兼咬唇問：「定係你想食我口水尾吖？」受寵若驚的GM把握機會接招：「如果你想我食，我唔介意㗎！」公然耍花耍，現場「花生友」江美儀被閃到尖叫。之後GM向Sophie展示手機裏面的愛心咖啡相，是Sophie用《愛‧回家之開心速遞》的角色Candy送咖啡給GM，笑指送咖啡好危險，因為會令人心跳好快，並指當年與Sophie合作《愛‧回家》期間，Sophie感受不到他不開心向他送上這杯「Candy Coffee」，令他好感動，不過因為這杯咖啡，令GM滿腦疑問，「你係咪成日都咁樣買畀其他人？」、「咁你可唔可以以後唔好請其他男仔飲？」、「我唔係咁想你對其他男仔好…」、「同埋…你想請邊個飲同我講，我幫你請佢哋飲。」Sophie被進擊的GM嚇到「嘩」一聲，反問GM是否「好易呷醋」，及追問會否介意她拍親熱戲，GM對此亦勁坦白說出心底話：「老實講，OK就唔OK㗎喇…」停頓數秒後害羞表示「要氹番我咯…」Sophie忍不住撒嬌。

東網網站 : https://on.cc/東網Facebook專頁 : https://www.facebook.com/onccnews/