網上熱話｜「盧海鵬」被指逼懷孕婦港鐵讓座 女事主：佢指住話我後生要讓
港鐵關愛座又惹爭議，社交平台昨日（19日）有影片瘋傳，一名貌似藝人盧海鵬的長者，在港鐵逼一名懷孕婦人讓座，女事主發文怒斥對方，指當時隔離已有人讓位，對面亦有空位，但「A貨盧海鵬」仍堅拒就坐，「手指指我…話我後生要我讓…話呢個位係老人家坐！」由於女事主稱自己懷孕初期「未見肚」，在爭吵一輪後才披露自己懷孕，惟對方卻稱「無人知你大肚」，女事主反斥「我點解要話比你知？」
該名懷孕女事主周二（19日）在社交平台Threads發片發帖稱，當時搭港鐵坐在關愛座，「本身懷孕初期未見肚亦唔想講」。她強調關愛座非專屬座位：「我唔覺得大肚先坐得（關愛座），就算我好人好者，有唔舒服有需要坐，使唔使向你解釋？」
她當時插住耳機，及後見到該長者「手指指我」，她除下耳機即被對方指責，「佢聲稱問咗我幾次……我隔離位起身佢都唔坐，話我後生要我讓，對面又有人起身又唔坐，話呢個位係老人家坐。」
女事主表示「我不停講我唔可以有需要？最後先忍唔住講係懷孕」，對方反駁「話冇人知」，女事主批評：「我點解要話畀你知？」該長者繼續指責「話要坐一定要有理由，因為呢個係老人座」，女事主嬲爆：「佢話問就一定要答，咁惡嘅啲XX。」
女事主：我依家好驚呀！
女事主公開爭執影片，可見其隔離位置另一關愛座未有人坐，她大聲說道：「我就大肚嘅，依家呢個人就大大聲指住我逼我讓座，我依家好驚呀！」該長者指著反駁：「唔好亂咁噏，無人知你大肚，你未話畀人知道！」女事主再說：「你睇吓呢個人幾惡呀，啲XX就係咁樣！」該長者聞言反駁道：「人哋只係問你啫，一啲都唔惡！你恃住咁嘅樣，唔怕，你認清楚啦。」
女事主其後再反駁，指有網民認為「我未見肚冇人知，叔叔問下好正常」，她強調當時在她「解釋」自己是孕婦前，其實「隔離位已經起身，但叔叔堅持要我讓」，「解釋後叔叔都唔賣帳，先會發生對罵，連隔離姨姨都忍唔住講：『其實我都讓咗畀你啦，人哋真係無必要向你解釋。』」女事主亦重申：「我唔覺得孕婦先坐得，我唔係個肚幾大好需要坐，只係我有位咪坐囉！到你批鬥我時我亦真係有原因，正如叔叔都睇唔到幾有需要，都覺得自己好需要呢個『老人專屬座』。」
網民力撐女事主 「佢係邊位要同佢解釋？」
事件引發網民討論，部分網民認為該長者不知道女事主懷孕，當時只需解釋便可化解紛爭：「其實同佢講聲自己懷孕唔舒服要坐就可以，唔需要動氣勞嘈，更加唔需要拍片擺上網。」
部分網民力撐女事主，認為關愛座不是強制座，有需要便坐，不需向人解釋：「上車使唔使同全車人交待自己大肚先坐得落去，佢係邊位？要同佢解釋？」、「關愛座係人都可以坐，你本人想關愛邊個先讓畀人坐」、「樓主無必要同所有人講自己大肚， 關愛座唔係老人座」 。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)