陳蕾新歌赴富士山拍MV失溫險暈低　預告年尾出碟以「我」作主題

陳蕾今日（21日）推出全新歌曲《空無之地》，繼續由她本人完成曲詞，Bert、To Lee、Eric Chan、Danny Yau完成編曲，並由Bert負責監製部份。新歌《空無之地》的詞語，來自一本名為《每一天，都是放手的練習》的書，意思是當人離開舒適圈、失去了本來屬於自己的東西後，所進入的一個「一無所有」而使人不安的境地。但是，陳蕾認為「空無之地」並不絕望，人反而要「無」，才會使自己日後擁有更多；人要「放下」手上的東西，才可以用這雙手創造更多可能性。

陳蕾說：「其實2020年已經開咗個頭，寫咗頭半段嘅歌詞，但一直諗唔到想點寫所以就一路擺咗喺度，時間嚟到2025都仲係覺得呢首歌自己都真係好鍾意，好想繼續推出嘅時候，我就嘗試去搵《空無之地》， 其實咩叫「空無」 呢？然後當我知道咗個意義之後，我就覺得「嘩！原來「空無」就咁聽落好似好悲傷、負面，但其實換個角度睇，可以係一個好好嘅機會比你做任何嘅嘗試、做任何嘅開創，我就俾呢個感覺深深感動到，寫到後半段嘅歌詞，所以呢首歌對我嚟講一路寫已經係有無限嘅感動湧現出嚟，可能係我寫過最感動到自己嘅一隻歌！」

陳蕾曾透露《空無之地》是她私心非常喜歡的一首歌曲，坦言於創作這首歌的時候，對於人生體悟多了一重意義。「如果呢一刻你覺得自己係一個好空無、搵唔到或者係離開咗自己嘅舒適圈而又見唔到前面曙光嘅嗰個階段，你唔好驚依家嘅自己兩手空空或者覺得而家好似失去咗好多，因為正正喺呢個階段，你咩都可以嘗試！因為你已經兩手空空，所以唔洗再怕失去！。」

陳蕾引用新歌的其中一句歌詞：『能夠放下便徒手　接萬有』！「完成呢首歌之後我自己覺得呢隻歌亦都成為我人生除咗《相信一切是最好的安排》之外，另一首好重要地支撐住我每一個階段嘅歌！」

為配合歌曲意境，團隊特意到東京富士山拍攝MV，全身黑色簡潔造型的陳蕾漫無目的地遊走於看似無盡頭的荒廢隧道、極簡水泥牆壁空間，更躺於富士山黑色泥土上，畫面盡現萬物虛無的感覺，畫面背後陳蕾可謂經歷盡艱辛，險於富士山因失溫暈倒！

陳蕾說：「因為今次去日本其實係要連拍三首歌嘅ＭV同埋嚟緊預計喺年尾就會推出嘅個人大碟入面嘅相，所以其實每一日都好唔夠瞓，再加上每日都要好早就化妝同埋要跑唔同地點嘅拍攝，拍呢首歌嘅ＭV嗰日嘅室外嘅天氣係好熱，講緊如果喺陽光底下我著嘅嗰套衫其實都會流汗嗰種，但係一去到隧道嗰個地方係凍到極度需要有件羽絨笠住。」

陳蕾續道：「我之前喺香港仲係度諗，嘩 夏天有時拍室內都覺得熱，唔洗帶保暖嘅衫去啦，點知去到就好後悔啦！一冷一熱加上又唔夠瞓，拍咗第一個鏡頭已經低血糖，我啲同事驚我真係暈係富士山，一CUT機就瘋狂咁比我食嘢、狂食朱古力，最後我係直情瞓咗係富士山嘅泥地上面差唔多20分鐘，啲血糖先慢慢開始升返上嚟，先至可以正常拍攝，好彩拍MV嗰件衫係睇唔到我個肚，如果唔係就真係浪費哂同事們嘅心機，哈哈！」

至於預計於年尾推出的個人大碟，陳蕾亦有劇透：「年尾嘅嗰張個人大碟其實係想講「我」，可能大家會成日見到開心嘅我、樂觀嘅我，但其實呢個「我」係除咗有開心同樂觀嘅「我」組成之外，仲有好多唔同面向嘅「我」組成，希望大家可以透過呢隻碟可以了解到更多、更立體嘅我。」