Tyson Yoshi飛落台玩插水變被抽水：畀人揸我波摸腹肌！

暌違3年歌手Tyson Yoshi終於踏上啟德開騷，於啟德體體藝館舉行一連三場《TYSON YOSHI THE VILLAIN LIVE IN HONG KONG》演唱會，昨晚（4日）頭場，三場演唱會後Tyson於7日飛歐洲行婚禮。是次演唱會以The Villain（反派/壞人）為主題，Tyson的服飾由開騷愈着愈少，有台下觀眾不時叫「除衫」，直至演唱會最後的環節，Tyson終極半裸上身滿足大家。由開騷連唱廿幾首歌後才開口講話，Tyson一開口便連橫爆粗，指看到觀眾披上黑色和白色的演唱會斗縫，講笑說：「好X型，邪教咁！」又讚觀眾聽話不帶燈應援燈：「係樂壇最X型。」

過往Tyson每場騷都有觀眾拋bra上台，今次也不例外，唱最後一首歌《In My Dream》時，觀眾拋了10幾個胸圍到台，有胸圍更寫了芳名，認真抵死。Tyson表演時完全不錫身，唱《Lose to You》時被吊起高離地幾米高，完騷前更玩插水整個人飛下台由觀眾接住，接住Tyson的觀眾，伸手亂摸狂抽水，他上回台後，怕壓親觀眾，一度擔心問有冇事。

首場的嘉賓是歌手周殷廷（YT），2人首次唱出合唱歌《1994》，YT原本着住皮褸，裏面仲着住「大隻佬衫」，皮褸時被卡住，要Tyson幫忙才除到，十分搞笑。着住大隻佬衫的YT笑問：「大家想唔想睇震波？」觀眾起哄，Tyson即場示範「震波」絕技，令全場嘩聲四起。之後Tyson帶點怕醜：「有啲Cheap咗，我哋係最型既，好有taste嘛，唔鍾意呢啲。」兩人又分享拍《1994》的趣事，Tyson：「拍打戲時，有個人拿住支嘢打落我度，佢話我墊咗pad，我話係肌肉，佢哋全部都墊曬pad，我就冇墊，所以我真痛。」YT講笑是第一次近距離看Tyson的身體：「原來係粉紅色，係咪大隻佬都係咁？」又讚Tyson工作認真，並非二世祖，「佢付出的努力和心機，好值得有呢個地位，希望你愈來愈紅。」Tyson感怕醜，講笑再講就罰錢。另外，Tyson跟合作無間的創作歌手Madboii表示：「冇你就冇我。」及預告會有《1994前傳》。

Tyson演唱會上戴了白色隱形眼鏡，自爆原本仲有一對全黑色隱形眼鏡，因戴後狂流眼水，惟有放棄。提到飛落台插水變了被抽水，他說：「係咁畀人揸我波摸腹肌，冇人將我向後傳，一停低就會榻。」明白觀眾買企位都是想玩插水，會再研究。他戲言明白在港鐵站被摸的感覺：「好多隻手亂摸。（摸下體？）重要部分feel唔到，顧唔到咁多，可能抽咗水都唔知，因為隔住條褲。」指老婆（Christy）只會覺得是自作孽。他說Christy今日（5日）生日，他準備在台上唱歌示愛，笑言深明為人夫的生存法則。

問將來會否取消拋bra環節？Tyson指將來若生小孩，擔心小朋友會被同學取笑，可能都要改變一下。另外，日前與蔡卓妍合作拍宣傳片，問將來可會有其他合作？他說：「拍MV？我請唔起佢，如果佢的MV我會去呀！（合作拍電影？）再睇吓，唔想拍出來唔滿意，希望有足夠時間，磿練演技先。」

東網網站 : https://on.cc/東網Facebook專頁 : https://www.facebook.com/onccnews/