吳幸美拮3cm長針測血糖　AI索女似女神混合體

由區永權、何沛珈、王嘉慧及吳幸美擔任主持的無綫健康資訊節目《健康新聞報道》，吳幸美繼續秉持「乜都夠膽試」態度、化身「測試勇者」接受各類型健康測試，拆解致命病因及健康秘訣。

當年因拍攝試飲「斷片酒」人氣急升的吳幸美，在節目中為測試空肚食大量荔枝是否真的會引致血糖低，除預先空肚8小時，還在手臂上裝了「連續血糖監測儀」，方便測試進食荔枝後、及荔枝在身體逗留了一段時間後的血糖反應。據知，「連續血糖監測儀」望落雖無甚特別，但內裏的針長長度至少3cm，要拮入手臂自然有一定痛楚。

吳幸美接受訪問時，透露雖然監察儀針有一定長度，但其實拮入手臂時並不算痛，反而是移除時最為疼痛，幸美說：「因為如果要做呢個測試，淨係篤手指一日都要篤8次，我覺得仲恐怖，咁不如捱一下痛嘅好過。最搞笑係，我嗰日去咗女導演嘅屋企搵佢幫我打，佢幫我打時手都震埋。其實打落去嗰吓唔算好痛，掹出嚟嗰吓先係最痛。」、「支針大概停留咗喺手臂兩日左右，而我除嗰陣可能冇特別搽啲乜，結果一掹完出嚟就係咁標血同埋有個窿。」她坦言完成測試後的感覺是興奮多於一切。

談到要在像真度高的停屍間及手術室進行拍攝，幸美笑言「回憶返晒嚟」，皆因她當年拍攝《法證先鋒》系列時，正是飾演歐陽震華的助手Kelly，她說：「呢個節目製作真係好認真，停屍間嘅櫃桶係可以拉出嚟。」

節目另一特色，是加入了「健康女神」AI Sammi衝出香港、在全球不同地方為觀眾報道各類型與健康有關的新聞、破解事件主角終極死亡真相。而無綫首推AI女主持Sammi，亦成功引起了網民的關注，有網民留言指Sammi似張曦雯及朱晨麗混合體！

東網網站 : https://on.cc/東網Facebook專頁 : https://www.facebook.com/onccnews/