娛圈單打︱患病又逢婚變　堅持樂觀自強

人生最慘係乜呢？有人話冇錢，有人話冇女，其實講到尾，最慘係冇健康！50歲前港姐季軍吳忻熹（吳文忻）去年乳癌復發，一直努力同病魔搏鬥，期間亦有拍片交代病情。唉，點知Natalie禍不單行，最近自爆另一個壞消息，宣布跟「南丫島王子」結束14年婚姻。患病又逢婚變，怎一個慘字了得！

眾所周知，Natalie 2011年下嫁有「南丫島王子」之稱嘅金融才俊陳劍陵，婚後育有兩女，一家四口好不溫馨。正當外界以為佢嫁得好、生活無憂之際，不幸消息卻接踵而至。2022年確診乳癌二期，接受治療後一度康復，詎料天不從人願，不久癌症復發，今年更惡化至第四期，令人心酸。

患病以來，Natalie樂觀面對，拍片交代病情，不忘鼓勵同路人不要放棄，更不時見兩女一齊亮相，成為佢抗癌嘅最大動力。女人最緊要靚，何況Natalie係港姐，見佢連接受化療脫髮亦唔介意公開，可見佢真係好堅強。為母則剛，為了陪伴女兒成長，Natalie誓要康復，外界亦紛紛送上祝福。

之不過，八卦嘅網民一直感到奇怪，就係為何患病以來，只見Natalie或兩女出鏡，唯獨唔見老公身影？老婆發生咁大件事，冇老公支持點得呀？家陣真相大白，原來雙方早已仳離。Natalie亦選擇只記住美好一面，直言「婚姻教我放下和感恩」，即使沒有童話般的結局，仍是生命中重要的一幕，獲網民大力讚好。

咁當然，呢個世界做乜都有人講，外界就猜測，Natalie患病，會否就係源於不愉快嘅婚姻？

東網網站 : https://on.cc/東網Facebook專頁 : https://www.facebook.com/onccnews/