關嘉敏親揭「反骨」真相 否認倒戈：人哋冇意欲簽我！
藝人關嘉敏（Carmen）近日接受電節目訪問，2016年以5人女團Bingo出道的她大談女團時代的辛酸，熱愛唱歌及表演的Carmen不理父母反對入行做了女團Bingo 4年，雖然入行前已因教跳舞儲了6位數，但出道不久已差不多將積蓄花光，她說：「我哋演出多數得車馬費，之後抽佣再要5個人分，我真係試過糧單得8毫子，我都嚇親！媽咪知道更擔心，每一日都問我夠唔夠錢使。」Carmen指那4年為追夢用了不少方法慳錢：「着嘅衫多數嚟自連鎖店，着完refund；其次，我唔出街食飯會自己帶飯，可以減肥又健康啲；第三我會行路，譬如我住黃大仙公司在九龍灣，會行返公司慳番啲車錢。」
其後她在2020年以ViuTV選秀騷《全民造星3》成名，Carmen坦言當年《造星3》雖然20強止步，但已大獲好評並成就了她人生首個事業轉捩點：「係好感恩好感謝《造星3》，之後真係接咗好多廣告，幾乎1個禮拜拍3個廣告。」至於翌年她突然轉簽無綫被網民鬧爆，Carmen說：「我哋出過道有經理人公司嗰啲，全部都冇簽Viu。Viu亦冇意欲簽我，亦冇義務要用我，但我亦多謝佢哋令我哋知名度提升。點解去邵氏？係我公司嘅決定，或者唔係一個good timing就畀人鬧到爆。係乜都鬧，最傷心最難頂係話我反骨，外間唔知原因，我喊咗3日3夜。同一時間，最支持我做呢行嘅阿嬷走咗，更唔想父母唔開心，所以冇無同屋企人講，只係匿埋喊。」除了自身被罵，Carmen的工作與收入同時被「罵停」：「當然客戶見到我發生咁嘅事，好多廣告都cut咗。有啲廣告亦因為咁落咗架，係好無助同無奈。我係無得揀嗰個，只有公司指令做，支持開我嘅人又無晒，係乜都無晒。」
轉投無綫後，Carmen視每一個出鏡機會都是一個良機，抱着得番大膽同無得輸的心態，最終憑搞笑扮嘢殺出一條血路。至於自認單身三年的她，問及近日參與《女神配對計劃》是為了出鏡機會或是想尋獲一段真感情？她說：「我認為搵到感情係bonus！我太耐無拍拖，只想搵返戀愛嗰種感覺。」Carmen自認性格男仔頭，身邊有很多男性朋友，不過她亦friend zone了大部份身邊異性。至於入行以來，她先後跟同公司天堂鳥的葉泓聲（Gordon），以及《造星3》的隊友陳宗澤（CY）傳過緋聞，她回應說：「你話Gordon，過咗咁耐唔怕講。當時大家係想了解，但最後係發展唔到。因為同公司太奇怪，會影響工作好麻煩。所以最後冇一齊，或者我唔適合同圈內嘅人。CY神經刀？我哋真係好friend，到而家都有約出嚟食飯！嗰時比賽我同佢住得好近，一齊搭地鐵架車郁，就影到我好似挨落去佢度咁。第二日我哋睇番報導，都係得啖笑！」Carmen坦言鍾情有才華的男性，所以配對節目中的姜卓文（細John），甚得她的歡心：「細John正呀！佢有機會呀，所以佢咪喺我嗰組囉。」
東網網站 : https://on.cc/東網Facebook專頁 : https://www.facebook.com/onccnews/