鄧麗欣新歌踢走糾結情緒 上山下海拍MV 忍痛赤腳行石灘

鄧麗欣（Stephy）將於9月20日在澳門威尼斯人綜藝館舉行《STEP by STEPHY鄧麗欣演唱會澳門站2025》，門票下周一（7日）早上10時接受優先購票。距離開騷尚有3個月，Stephy正積極備戰，專注於恢復運動鍛練。她笑言「完咗香港站唔係偷懶」，只因肩頸勞損而需暫停劇烈運動，最近才重新開始舉重。她正蒐集歌迷意見，考慮是否更換歌單內容。

籌備演唱會期間，Stephy捉緊時間推出有份作詞的新歌《立斷》，她表示新歌講述一段曾困擾她已久的情感糾結︰「講緊一段圍繞咗我好長時間、情緒糾結嘅關係，今日自己成長咗，經歷咗咁多嘢之後，懂得將呢啲情緒斷開，唔好畀自己糾結喺唔開心嘅狀態入面。佢仲有更深層嘅意義，但好多嘢唔想講得太白，希望大家聽歌、睇歌詞時思考吓。」

拍攝MV當日，Stephy不但上山下海，還經歷酷熱天氣和滂沱大雨。她先是早上在33度烈日下到海灘拍攝落水鏡頭，赤腳漫步在石堆上，優雅背後卻忍受着腳板刺痛。導演停機後，她立即面露痛苦表情笑說：「我表情係咪都管理得唔錯呢？我仲要懶靚咁，但其實好痛。」下午時，Stephy轉戰山頭與8位舞者跳舞，其間天色突變下大雨，幸好暴雨過後漸變天晴。拍攝前，Stephy與排舞師反覆練習不同動作，再與Dancers拼湊出唯美畫面。她說：「跳舞同學仔同我跳咗啲好有意思嘅舞步，我都唔好意思話我參與跳舞，主要都係肢體形態，我唔係好識跳現代舞，無謂獻醜就唔跳太多，配合幾個動作咁。佢哋好辛苦，又落雨淋濕晒，又要用紗冚住個頭，見佢哋出晒汗黏住晒啲頭髮，好多謝佢哋嘅參與。」

Stephy晚上再到Studio拍攝投影部分，很多不同顏色的圖案投影在Stephy的臉上，她又用指尖輕畫水面形成波浪，攝影師在水缸下捕捉唯美瞬間。Stephy回想着一整天發生的事時說：「經歷咗差唔多四季，今朝就出猛太陽好熱，跟住又好潮濕有春天嘅感覺。下晝就開始落雨、烏雲密佈，但好彩落完雨都拍到想拍嘅部分。夜晚就去返室內拍啲Mood嘢，呢首歌冇特別要講故事，希望攞啲比較靚、有詩意嘅畫面。好好玩，係畫面上講故仔，而唔係用故仔去形容呢首歌。」

（即時娛樂）