Tiger@MIRROR為英皇女團拍MV　獲VIVA封「暖男導演」

英皇女團VIVA推出新歌《不夠浪漫的我們》，一改以往跳唱風格，首次挑戰抒情慢歌，更是向隊友的表白之歌。歌曲由KW朱敏希作曲、王樂儀填詞，歌詞「就算不夠優秀都想與你學捱義氣」道出四女這一年來的深厚感情。

今次MV特別邀請Tiger@MIRROR執導，VIVA對這位「暖男導演」讚不絕口：「佢係一個好warm同埋好有熱誠嘅人，佢好細心，有種好暖男嘅感覺，佢唔係嗰啲會一嚟就好多嘢講，但佢係嗰種喺背後做好多嘢嘅人。佢聽晒我哋啲囉嗦意見，仲要整合得好好！唔會限死我哋，俾好大空間我哋發揮。」

VIVA成軍短短一年，Ada、Carina、Macy跟VALC由原本不太熟悉，到現在感情大躍進。一年過去，見證隊員之間的改變：「可能一開始我嘅voice會好明顯，之後會慢慢就會shift，可能係Ada、然後Macy。喺我哋住宿舍嗰排，feel到Macy突然間好媽媽feel。近期開始覺得VALC對我哋好奇心大咗，因為最近佢會成日都問我哋：『呀！你講咗啲咩啊？咩事呀？』呢個都係我哋行close咗嘅證明。」

《不夠浪漫的我們》MV以啦啦隊為主題，一開始是Macy於隊中出現，然後Ada、Carina及VALC才加入，就如現實生活中，四人成軍的過程一樣。當中最令人難忘嘅是Carina拍攝期間突然暈低。Carina表示拍MV前兩日食物中毒，不停嘔吐，拍攝當日在沙灘跑幾轉後便暈倒。VALC邊說邊笑：「跟住有個scene我哋係要扮傾偈，見到佢隻眼慢慢開始閂埋，哈哈。」Carina接着說：「其實我望住佢哋嘅時候，佢哋已經係慢慢變成白色，我係死頂撐大對眼，但其實係乜都望唔到，唔知道發生咩事。」