娛圈單打︱就算真係扮單身　睇騷唔使太認真

TVB戀綜《女神配對計劃》播到呢一刻，已誕生唔少疑似情侶，包括曾展望同葉蒨文、羅毓儀同林俊其，兩Pair都被目擊私下拍拖約會，難怪觀眾紛紛質疑，賽果已定，節目已完。

好啦，呢兩Pair搞掂咗啫，咁仲有另外幾位女神未有定案嘅。好似節目開始不久，即顯得冧爆嘅關嘉敏及姜卓文（細John），發展下去始終未太激得起火花，最近細John更被踢爆早已名草有主。據指，曾拍露股寫真嘅火辣網紅CoCo，原來早就同細John撻着，得悉男友參加配對計劃而吵大鑊，目前瀕臨分手邊緣。

嗱，八卦嘅網民收到風後，即刻批評細John唔應該扮Single參加節目，仲講到佢欺騙咗關嘉敏感情咁款，認真誇張！計本欄話齋，認真就輸了，睇娛樂節目啫，Why So Serious？真係啱Feel墮入愛河固然可喜，否則咪當識個朋友、增加知名度囉，點計都係有So。畢竟大家都係藝人，都要做好份工。

細John都知輿論點睇，好快就回應事件。佢話喎，數年前喺網上認識CoCo，一直保持網友關係，直到今年初CoCo從加拿大回港，佢自己又正值單身，「雙方確互有好感，也交換過一些甜言蜜語，曾數次約會」，不過始終冇進一步發展，亦無親密行為。總之，就係撇清關係。

喂，後生仔溝吓女都好正常啫，根本毋須苛責，細John都好盡責地即時澄清，以免拖累節目、影響觀眾觀感。點都好啦，本欄老早已經講過，睇呢類戀綜可以投入、切忌認真，用嚟消磨吓時間，大家又多個話題，已是功德圓滿！

東網網站 : https://on.cc/東網Facebook專頁 : https://www.facebook.com/onccnews/