關智斌為個唱「擺金陣」　獲老闆楊受成送金帆船

關智斌（Kenny）昨日（8月5日）宣佈開演唱會，今日就到英皇珠寶「掃金」旺一旺，而且有全盤計劃，諗住施展「屈金大法」，搏老闆英皇集團主席楊受成送禮。楊博士竟然快他一步，一早準備一隻「一帆風順」金帆船等他，Kenny立即開心到彈起兼自爆：「我仲諗住屈佢㗎！」

Kenny自爆整個「屈金計劃」：「我頭先特登打俾老闆秘書，問老闆會唔會巡舖，諗住捕住佢，等我有折頭或者屈吓佢送嘢嘛！」結果，楊博士一入舖見他就有所表示：「我有嘢送俾你呀！」Kenny即刻呆咗：「吓？我仲諗住屈你喎老闆！」楊博士隨即叫同事拿出預先訂製的金帆船，Kenny即興奮：「真係㗎？多謝呀老闆！我仲諗住要出招㖭！」

自言是「八卦仔」的Kenny最近迷上「擺金陣」，「話要多啲金嘛！我諗住錄音室、化妝間全部擺金。」楊博士回應一句：「啲金好貴喎，你條友仔！」。Kenny雄心壯志地說：「我而家目標好明確，做好個Show，下次再開就可以收多啲金……同埋錶。」更笑指這是員工福利。楊博士為Kenny打氣期間，突然爆句：「聽講你個『波霸』好犀利！」Kenny急急澄清：「個Body吖嘛！到時Show俾你睇。」嚇到老闆耍手擰頭，「嘩！唔使唔使！千祈唔好！」。

最後楊受成贈句「一票難求！一帆風順。」Kenny即表示：「我會努力！爭氣！」臨走前，Kenny得意洋洋謂：「任務達成！搶咗嚿金返嚟……呀，唔係搶，係老闆送嘅！」Kenny表示，必定全力以赴，瞓身做好個Show報答楊博士：「咁就可以再收多啲金！」。