娛圈單打︱意外一宗都嫌多　慘劇千祈咪重演

唱作才子林家謙於紅館舉行一連10場演唱會，CLS梗係興奮啦，點知上周五嗰場，竟然發生舞蹈員「墮窿」意外，觀眾捏一把冷汗。話說大家正在台上勁歌熱舞之際，台上一個機關突然打開，舞蹈員無預警踏空跌入大窿。幸好該舞蹈員即晚已報平安，冇穿冇爛，可謂不幸中嘅大幸。

嗱，有連睇多場嘅CLS透露，幾乎晚晚演唱會都有啲蝦碌位，機關同歌手、舞者不同步嘅情況時有發生，促請主辦方改善。咁又係呀，2022年MIRROR紅館演唱會墮屏慘劇，令人記憶猶新，舞蹈員阿Mo慘遭砸中，醫到今日仲係癱瘓，慘絕人寰。

又好似去年某天王喺內地開巡迴演唱會，都出過多次狀況，包括差啲衝咗落兩米高嘅舞台，以及曾經跌入舞台大窿，嚇到粉絲鼻哥窿冇肉。大家真係唔明，香港製作演唱會已經有幾十年經驗，鮮有意外發生，冇理由直到近年，水準每況愈下啫。

唔好怪本欄唔嗅米氣，又攞K-Pop嚟講。好似早前先至嚟過香港、目前唱到去美國嘅G-Dragon，演唱會花臣多多，又激光又煙火，又花車又吊臂，跳足全場，未聞有甩漏嘢發生。遑論女子天團BLACK PINK，全球巡唱幾十場，花臣多多，一樣安全度過。人哋做得到，香港做不到，想唔承認本地製作兒戲都唔得！

講到尾，小心駛得萬年船，舞台安全要求必須嚴格把關。一味錢要賺盡，製作成本則不斷壓縮，遲早又爆大鑊㗎咋！所以啫，香港要認真發展演唱會經濟，一要打擊黃牛，二要提高製作水平，否則吹到幾大都係嘥氣！

東網網站 : https://on.cc/東網Facebook專頁 : https://www.facebook.com/onccnews/