炎明熹被雪藏近1年　遊日睇煙花感觸落淚

「樂壇小天后」炎明熹（Gigi）因續約問題而遭雪藏近一年，冇Job一身輕的她不時到外地旅遊。近日其官方後援會就上載了一條Gigi在日本旅行的短片，條片足足有8分鐘，令一班「Gi炎粉」相當驚喜。片中Gigi發揮一貫率真本色，一開始她就自爆生了粒大痱滋，並張開嘴給大家欣賞，毫無偶像包袱，她自言正在吃雞理料，笑言：「如果雞見到呢煲嘢應該會好驚，因為佢被分屍咗，佢哋應該會勁驚。但我屬雞。」她又反問若可以選擇，會寧願生痱滋還是生暗瘡？之後鏡頭一轉她就去了福岡動物園，她非常體貼地表示：「我有一個毛毛袋，我本身諗住帶，但都係唔好，因為驚啲毛令到啲動物驚咗。」認真可愛！

最後Gigi去了看煙花大會，卻忽然感性落淚，她解釋：「我想講，我知道我點解想喊，因為尤其係好大嗰啲煙花，佢要衝到愈上，佢先可以愈震撼，見到佢好努力咁衝上去，所以我就覺得好感動唔知點解，即係佢衝得勁快，然之後就，我要努力綻放。」片尾是「煙花拼盡一生，只為這一刻燦爛，致每天努力綻放的你。」粉絲大讚Gigi既幽默又有深度，希望她能早日出關，見到她再次綻放。

東網網站 : https://on.cc/東網Facebook專頁 : https://www.facebook.com/onccnews/