佘詩曼50歲生日前愛犬離世　強忍淚水開工：計劃唔夠變化快

佘詩曼5月28日踏入50歲，最近忙於在拍攝《新聞女王2》的她，獲劇組及好友送上生日驚喜。不過，原來在開心慶祝的同時，陪伴阿佘13年的愛犬Noble日前離世，令她心情直插谷底。

佘詩曼在社交平台發文，雖然面對愛犬的離世，但她仍然強忍淚水盡力投入工作：「終於咪完劇本，有少少時間靜靜地回味吓，我一班好朋友為我生日帶嚟嘅驚喜。冇諗過、冇預感，會咁開心咁渡過咗其實唔係好想面對嘅一日。其實喺我生日前兩日，陪伴咗我13年嘅Noble因為身體不適突然離世，我心情跌到落谷底，由於要對Man姐負責，所以強忍淚水，盡量做到秒速平復情緒。就係咁樣，完全唔打算有任何慶祝活動。點不知，計劃永遠都唔夠變化快，一打開門，全部friend彈晒出嚟，嗰吓真係嚇一嚇！仲好記得你哋一張張充滿愛嘅笑臉，你哋嘅笑聲讓我忘記一切，亦超越一切！仲要突然宣布第日放假一天，心情簡直衝上雲霄！」。

阿佘感謝好友和劇組為他慶祝生日：「其中一個環節，播放我嘅偶像、我嘅朋友暖暖嘅祝福，有令我尖叫嘅、有令我爆笑嘅、亦有令我感動流淚嘅…多謝你哋每一位，我太幸福了！有一班咁錫我、咁愛我、咁好玩、咁癲嘅好朋友！所謂一浪接一浪，轉場之後，估唔到再有一班人彈出嚟，正是開到如火如荼嘅『新聞女王』演員、監製同導演。就係咁樣，我生日嗰日變成係我全年最開心嘅一日～放心冇斷片，全部在心中！I love you all P.S 特別鳴謝我至愛嘅好朋友及經理人 @the_joanne_chan 悉心嘅安排！You are the best！Love you bro 盡在不言中」。