羅子溢零對白晒演技　因1事收工唔敢即刻返屋企

電視劇《執法者們》進入結局篇，羅子溢飾演「張建邦」在兩場焦點場口均展現了沉鬱內斂演技，在一場長達分半鐘的駕車戲中，子溢全程零對白的情況，靠微表情、眼神及快要奪眶而出的眼淚，演活了角色複雜的內心情緒。而在吞槍不果一幕，羅子溢亦將歇斯底里的情緒發揮得淋漓盡致，獲兩地網民好評。

子溢接受訪問時坦言十分喜歡這個角色，覺得有挑戰性，故在細節位上花了不少心思：「我自己好深入了解過呢個角色嘅背景，一個鬱鬱不得志嘅執法人員做咗一件壞事，然後一個大話冚一個大話去掩飾自己仲可以繼續做…平時我哋喺片場係好融洽有講有笑，但拍呢套劇我每日去到片場，其實我會唔畀自己好開心、壓抑自己嘅情緒，等自己可以喺一個接近負面嘅情緒下去演繹每一句對白同每一個眼神，同埋要營造一個心虛嘅感覺，因為咁先會對所有事都好敏感。」

不過他亦坦言每次拍完沉重的戲份，都不敢立即回家，因不想有任何負面情緒影響到家人：「我會坐喺片場度大概半個鐘，同啲工作人員傾吓偈，令個人開心番，等自己唔好帶任何負面情緒返屋企。呢個係好緊要，畀自己去放低、或者Relax吓。」子溢為做好角色，對於劇中恩師黃宗澤（Bosco）充滿愛：「呢樣嘢我都有同導演傾過，我覺得我對 Bosco係要夾雜住友情、兄弟情，甚至係親人嘅愛，一定要有愛嘅心，個角色做嘅事先有立腳點。」

東網網站 : https://on.cc/東網Facebook專頁 : https://www.facebook.com/onccnews/