王敏奕曾國祥同框證婚姻狀況　張兆輝獲女兒撐場

由彭發導演、張兆輝與王敏奕主演的電影《空心人》今日（7日）舉行首映，王敏奕的導演老公曾國祥也有專盛捧太太場。彭發形容心情似生仔，今日BB終於出世，張兆輝笑言：「最緊要生出嚟係靚仔靚女，戲中王敏奕好似師奶咁，其實真人好靚，係導演搞到佢咁。」王敏奕就話無論BB的樣子如何，都會一樣愛他，又謂：「老公有見過我喺戲中嘅造型，佢好期待睇到我嘅作品。（有冇向老公請教？）唔需要因為有導演指導我哋，平時好少同老公對戲，除非有啲地方唔識演，就會請教佢。」

講到張兆輝在片中的角色沉重，回家後要如何抽離，他坦言因為拍攝時間緊迫，所以不用抽離：「返屋企食個飯、瞓一覺，就要再拍，如果抽離咗就好麻煩。」除了王敏奕有老公支持，張兆輝的一對子女張焯鏗與張卓姿亦在場，女兒更擔任首映司儀，他解釋：「難得我個電影上映，所以畀佢學吓嘢，囡囡讀緊關於電影電視製作。（囡囡想入行做幕前？）佢比較鍾意做幕後，平時都會寫劇本。（會唔會推介囡囡畀彭發導演？）張睇佢有冇潛質先。」彭發即開玩笑說：「咁要睇封利是有幾大。」

講到電影市道不景氣，會否擔心票房，彭發直言：「擔心到唔需要擔心，因為係冇辦法，只能盡做。」王敏奕揚言會盡量抽空謝票：「謝票對演員幾大鼓勵，可以直接面對觀眾面對面溝通。」另外，彭發被問到患癌太太的身體情況，他稱OK。

同場，藝人關楓馨與父親關禮傑一齊出席電影首映禮，首次拍電影的關楓馨指投身大銀幕，感覺非常特別：「拍電影同拍電視好唔同，表情處理方法都唔一樣。」關禮傑則指有看過囡囡一些拍攝片段，覺得好有驚喜，問他會否教女兒幾招？關禮傑笑言：「有導演彭發同老友張兆輝睇住，而家到我學嘢至真。」

關楓馨正與前港隊欖球員徐灝晴拍拖，關禮傑先扮傻反問：「下，乜佢有咩。」之後再笑言只要女兒ＯＫ他便ＯＫ，不過，最緊要都要關楓馨的媽咪ＯＫ。關楓馨則直言很感謝母親，由讀書到出來做事，都沒有給她壓力，談到現在跟男友感情如何？她笑言：「關係ＯＫ嘅。（會唔會閃婚？）好難講，可能我１０年都嫁唔出呢！」問關禮傑會不會不捨得女兒出嫁，關禮傑則說：「捨不得。」

東網網站 : https://on.cc/東網Facebook專頁 : https://www.facebook.com/onccnews/